Senior huangah Jeho-a'n medal a la

India ram pum huapa table tennis inelna ngaihhlut - 3rd UTT National Ranking Table Tennis Championship khelh zawh takah Jeho Himnakulhpuingheta chuan bronze medal a hlawh chhuak.

Mizo tlangval Jeho-a hi men's singles huangah a inlan a, champion phak ta chiah lo mah se senior huanga a thlen chin hi Mizoram tan chuan rahbi thar a ni a, Mizo player dangin an la tih theih ngai loh a ni.

Kum bithliah inelna hrang hranga lo hlawhtling tawh Jeho-a hian semifinal a thleng a, final luh inchuhna inkhelah national champion lo ni tawh Ronit Bhanja lakah 2-4 in a vanduai a, a thlen chin erawh sang tak a tling tho.

Semifinal kalkawngah hian player ṭha bik, Commonwealth Games gold medal pawh lo la tawh Sanil Shetty chu deciding game-ah 11-9 in a hneh a, player 362 inlan zingah pawh a thiam leh langsat zinga mi a ni phak.

Jeho-a chuan, "Theihtawpa ka inbuatsaihna te Pathianin mal min sawmsak a, tun hun ka tleng thei hi ka lawm takzet. Min thlawptu zawng zawng chungah lawmthu ka sawi takzet a ni," tiin Vanglaini a hrilh.

Mizoram Table Tennis Association (MTTA) chuan, "3rd National Ranking Table Tennis Championships - 2025, Indore a neih zawh tak a inelna ngaihhlut hlawh ber men's singles inelna huanga bronze medal la a, rampum huap table tennis senior level a Mizoram hming rin lût a, ti hming ṭhatu Jeho Himnakulhpuingheta kan chhuang in kan lawmpui hle a ni," an ti.

Jeho-a hian nimin tlai khan Mizoram a lo thleng a, MTTA huaihawtin Lengpuiah lo hmuah a ni.