Goal khung mamawh Aston Villa

Aston Villa manager Unai Emery hian tun hmain Arsenal a enkawl tawh ṭhin a, attacking football ngainatu a ni. Si khat faia chak ai chuan 5-4 a chak duhtu a ni a, a venhim aiin a nawr lam an uar zawk ṭhin.

Spanish manager hian Villa a enkawl hnuah pawh a kalphung a thlak lem lo. Mahse, tun season zet chu an tan a harsa. Premier League match 10 an khelh tawh chinah goal kua chiah an la khung.

Villa aia goal khung tlem chu Nottingham Forest leh Wolves te an ni a, table mawngphah lama awm pahnih hian goal sarih ve ve an khung. League chauh ni loin Villa hian Europa League lamah pawh goal an khung tam tawk lo.

Unai Emery-a'n striker Ollie Watkins chungah rinna a nghat ngam ta meuh lo emawni tih mai tur a ni a, zanina Maccabi Tel-Aviv nen Europa League an khelh hunah pawh Watkins hi a inlan ang em tih sawi theih a la ni lo bawk.

Watkins aiin John McGinn chu ngaihven hlawh zawk a ni ang. McGinn hi ball semtu a nih bakah a khung tel ṭhin - tun season Europa League match pathum aṭangin goal hnih a khung tawh; ani hi Maccabi Tel-Aviv tana ven uluk ngai tur a ni ang.

Goal khung an harsat ṭhin avangin Villa hi chak chiang tura dah sa an rem bik lo. Emery naute hi Liverpool hneh lo hlim an nih avangin insiamṭhat an duh dawn a, result ṭha nei tur erawh chuan an hmatawng te an hriam lehzual a ngai dawn a ni.