A vawi nga nan GSW an chak

Nimin zing NBA regular season inkhel hmunawmah Golden State Warriors chuan Phoenix Suns chu 118-107 in an hneh a, tun season kal laia a vawi nga nan hnehna an chang tling ve ta chiah.

Chase Center hi Warriors tan chuan hmun ṭha a ni, khualmuala an chetsual pawhin anmahni khelmualah chuan an chak leh mai ṭhin - Suns lakah pawh Stephen Curry chuan 3-points vawi nga vawm lutin a pumpuiah point 28 a nei.

Curry bakah hian point 24 neitu Moses Moody, Quinten Post (14), Brandin Podziemski (13) leh Buddy Hield (12) te an langsar bawk a, a zawna vawi hnih chak zawn thei Suns lakah an phu ang ngeiin hnehna an chang.

Hun tawp dawn lam minute sarih chauh a awm tawh tihin Suns hi point 19 laiin an hniam zawk, hetih lai hian a zawna point 10 ngawt an neih avangin an beiseina a sang leh hman hle, a tawpah erawh GSW an chungnung tlang ta zawk a ni.