Chanmari Jno. 8 ni reng tur Chhinga

Chanmari FC chuan November 5, Nilaini zan khan Chanmari YMA Hall-ah G.I.G Motors MPL12 champion an lawm a, champion puitu coach Rochhingpuia chungah chawimawina hlu bik an hlan. Chanmariin an fapa rangkachak Chhinga jersey no. hak ṭhin 8 chu tumah hak theih loh turin an dah hrang.

Chanmari hian kum 1989 leh 1990 khan CYMA Football-ah final an lut tawh a, football thiam veng an ni. Kum 2000 chhoah erawh Chanmari hi football thiam veng tia sawi tur an ni tawh lo a, Chhinga te ṭhianhoin an vengah football an rawn kai tho.

Chhinga hian player angin Mizoram Premier League, I Day Football, MFA Cup leh MFA Super Cup-ah Chanmari FC a champion pui a, veng inelnaah Red Ribbon Football leh CYMA Football thlengin a champion pui bawk. Coach a nih hnuah I Day Football leh MPL a champion pui leh a, Chanmariin an hnathawh ropuizia hriain a chawimawi nan player a nih laia a number hak ṭhin number 8 chu an dah ṭha.

Chanmari coach Chhinga hi CKTP Committee member a nih bakah Presbyterian Youth Fellowship (PYF) asst. secretary a nih avangin Shillong leh Delhi-ah programme pawimawh a nei a, champion lawm zan hian a tel thei lo. Chhinga nupui Lalchampuii chuan chawimawina hi a dawng. CFC hian Chanmari jersey no. 8 leh Chhinga hming chuanna chu mawi takin an frame a ni.

MPL12 khelh zawh takah Chanmari FC hian final-ah champion lai Aizawl FC chu Christopher Kamei-a goal hmangin 1-0 in an hneh a, MPL5 hnuah a vawi khat nan nomawi chawi lehin Mizoram chhunga inelna sang ber MPL nomawi a vawi thum nan an chawi chiah. Champion lawm zan hian Chanmari hruaitu hlui leh fan ruhkawl chatuan ram pan ta te, sunna hun hman a ni bawk.