Goal thum chhuahtu Barcelona

Barcelona chuan Club Brugge lakah goal thum khung mah se, goal thum an chhuah tel avangin an chak zo lo a, Belgian club nen hian 3-3 in an inhnehtawk.

Result en tawp tan chuan Barcelona-in Club Brugge an hneh zo lo hi thilmak a ni a, inkhel en tan erawh chuan Hansi Flick-a nauten point thum an hawn hi an vannei hle, tih loh rual a ni lo.

Club Brugge hian minute rukna lekah goal hmahruai an khung a, Carlos Forbs-a siamsak chu Nicolo Tresoldi chuan a khung - mahse, Belgian club ṭantute hlim authawm pawh a reh fel hmain Barca-in si phurh an sut.

Season duhawm tak hmangtu Ferran Torres chuan Fermin Lopez-a siamsak chu goal an chhuah aṭanga minute hnih hnu lawkah a khung ve leh a, minute riat chhungin 1-1 a ni hman der!

Barca tan Fermin-a'n post a pet per zui a, mahse, Club Brugge-in tlawm an tum lo. Barca goal khung tamna chhan, an high defensive line chu Belgian club hian Barca chhut nan an hmang a, an ngam hle.

Minute 17-na lekah Club Brugge zawk hian an khung belh leh a, Christos Tzolis siamsak chu Forbs chuan goal-ah a chantir. Mualneitu team-in 2-1 in hma an hruai.

Barcelona-in Jules Kounde leh Eric Garcia hmanga post an tihper hnuah, si phurh an sut leh ta nge nge a, Lamine Yamal chuan defender pahnih ven rual lohin, mawi zetin si phurh sutna goal a khung.

Mahse, Club Brugge rilru a huaisen tlat a, Barcelona an zuam laklawh. Season hmasaa Wolverhampton Wanderers-a loan-a a khelh laia hlawhchham Forbs-a'n chance duhawm tak a hlah hnuah goal a khung belh a, 3-2 a ni.

Brugge hian goal lina khung theihna remchang an nei zui a, Alex Balde chuan goal hnih khung tawhtu Forbs a titlu. Referee Anthony Taylor-a'n penalty spot a kawk a, video assistant referee (VAR) a inrawlh hnuah penalty hi pawm a ni leh lo!

Barca an thaw huai a, si phurh an sut zui. Yamal-a cross aṭanga ball kal chu Christos Tzolis chuan an lamah a tilut a, minute 77-naah 3-3 a ni ta daih.

Mahse, Barca fan-ten thlamuangin Belgium-ah hun an hmang lo. Romeo Vermant chuan Brugge tan chakna goal a khungah a inngai a, mahse, VAR chuan Vermant-a'n goal a khung hma hian Barca keeper Wojciech Szczesny lakah a foul niin a ngai a, Vermant-a goal chu pawm a ni lo!

Hun tawp thlengin goal dang a lut lo a, Club Brugge an vanduai takzet - Barcelona lakah goal thum an khung a, an penalty leh goal khung dang VAR hmanga pawmsak an ni lo a, na an ti vawng

vawng ang.

Barca hian UCL match li an khelh tawhah vawi hnih hnehna changin, vawi khat an tlawm a, vawi khat draw an nei - hmabak match li la awmna Chelsea chu hautak tur awmchhun niin a lang tawh a, beisei ang result la nei lo mah se, an fixture enin hlauhthawnawm niin a lang lo.