Newcastle United an chak

West Ham laka an tlawm hnua sawisel hlawh tak Newcastle United chuan Champions League lamah hnehna an chang a, an mikhual Athletic Bilbao chu 2-0 in an hneh.

Magpies tan Dan Burn leh Joelinton te chuan goal khat ve ve an khung a, St James' Park-a inkhelah Bilbao-in a chhanletna tur an neih loh avangin Newcastle an chak.

Newcastle tan tuna an chak hi UCL match thum a zawna an chakna chiah a ni a, EPL lamah beisei an phak loh avangin Europe-a an result ṭha hian fan-te rilru na engemaw chen chu a chhawk zangkhai ang.

Magpies hian Champions League an match hmasa berah Barcelona chu 2-1 in ngam lo mah se, Union Saint-Gilloise (4-0), Benfica (3-0) leh Athletic Bilbao (2-0) te a zawnin an hneh ta a, match li khelh an la hmabakah Paris Saint-Germain chu match harsa tur awmchhun niin a lang tawh.

Hetihlai hian Premier League-ah erawh beisei an phak lo rih hle. Match 10 an khelh tawhah vawi thum chiah la chakin, vawi li an tlawm a, vawi thum draw an nei - Pathianni zan dar 7:30-ah Brentford an lenchilh ang.