Chak mah se Chivu a lawm lo

Lautaro Martinez leh Carlos Augusto te goal khung hmangin Inter Milan chuan Kairat Almaty chu 2-1 in an hneh a, tun season Champions League match li an khelh tawh chinah an la chak vek.

Inter Milan bakah hian Arsenal leh Bayern Munich te chu chak kim thei an ni a, an dinhmun ṭha viau mah se Inter coach Cristian Chivu chu an khelh danah a lawm tawk lo, ama mawhphruhna a nih thu a sawi bawk a ni.

Chivu chuan, "Goal khung kha kan harsat em em mai a, hun chanve hma lam kha chu inkhel thunun tak chung si khan a hmawr kan bawk thei lo, a tawpah erawh kan khung ta hram, siamṭhat ngai lai tam tak ka hmu.

"Point thum kan hmu a, table-ah kan dinhmun a ṭha bawk. Amaherawhchu, kan inkhelah khan nghet lo leh fuh tawk lo lai tam tak a awm, chumi siamṭhat chu keima mawhphurhna a ni tih ka hria, hma ka la nghal ang," tiin a sawi.

Inter Milan hian goal khung theihna remchang an hmuh hmasak ho an hlah nasa, striker ṭha Martinez ngei pawhin holam takin a hlah a, penalty an beisei chu video assistant referee rawn a nih hnuah an hnawlsak bawk.

Argentina international Martinez erawh dan reng theih a ni lo, chawlhlawk hma chiahin goal a khung, a shot hmasa zawk chu lo dansak mah se ball per hi a hma zawnah a kal a, a vawi hnihna chu an dang thei tawh lo.

San Siro-a inkhelah hian second half tir lamah mikhualin goal an khung, corner aṭanga ball kal chu Ofri Arad chuan a tauh lut - a ball tauh hmasa zawk. Box chhungah ball hi sang taka tauh hmasak a ni a, a lo tla leh lam hi duh tawkin a tauh - Inter player ten an veng ṭha tawk lo.

A hnuah erawh Inter tan Carlos Augusto chuan chakna goal a khung. Captain Martinez aṭangin mawi zetin ball an inpe ṭan a, a tawpah Augusto hian box pawn aṭangin goal kilah a pet lut a, goal dang kan hmu zui tawh lo.

Inter tan an chak hi a lawmawm ang, chutihrualin Kazakhstan Premier League team lakah an tlarhnung a phui lo a, goal khat an chhuah bakah keeper Yann Sommer-a'n a chhan leh hlauh ṭhin a, goal tam zawk an chhuah loh avangin an vannei a ni.