NBA team an chak lo kim ta

Basketball inelna ngaihhlut NBA regular season kal laiah tlawm loa kaltluang thei an awm ta lo - nimin zing khan Oklahoma City Thunder chu Portland Trail Blazers lakah 121-119 in an chak lo, anni tlawm loa chak zawn rei thei ber an ni a, tunah erawh an tlawm ve ta a ni.

NBA champion lai Thunder hi an match hmasa pariatah an chak vek, tun ṭumah pawh hian chak tura rinkai an ni. Point 22 laia hmahruai fal lai te an nei a, a tawpah erawh Portland lamin an beidawn duh loh rah an seng ta zawk.

Oklahoma City tan Shai Gilgeous-Alexander chuan point 25 a nei a, season hmasa Most Valuable Player hian a zawnin match 81 chhung chu point 20 a nei tling ta ziah a, a zawna hetiang zat point neih tlin rei zawngah pathumna a ni mek.

Nimin zing inkhel dangah Brooklyn Nets chuan Indiana Pacers 112-103 in an hneh a, season kal laiah a vawi khat nan an chak - NBA team inlan zawng zawngin hnehna an chang kim ta chiah bawk a ni.

Denver Nuggets tan Nikola Jokic chuan triple-double neiin a team hi Miami Heat lakah 122-112 in a chak pui. New York Knicks chuan Minnesota Timberwolves chu 137-114 in an hneh bawk, an point hmuh zinga 83 lai hi second half chhunga an nei a ni.