Swiatek hnehin Anisimova a tlang

WTA Finals khelh laiah Amanda Anisimova chuan Iga Swiatek 6-7(3), 6-4, 6-2 in a hneh a, inkhel pawimawh bika a chak avang hian semifinal a inhlangkai zui nghal bawk.

Serena Williams Group aṭangin Elena Rybakina a tlang fel tawh a, group match hnuhnung berah Swiatek leh Anisimova te hian hmun ruak pakhat zawk an inchuh, chak ngei ngei ngaihna inkhelah Anisimova a chungnung ta zawk a ni.

Player pahnihte hi Wimbledon final-ah khan an lo intawng tawh, tawnhriat nei ṭha Swiatek hian 6-0, 6-0 in hnehna a lo chang tawh, tun ṭumah pawh hian chak tura rinkai zawk a ni bawk.

Mahse, a vawi khat nana WTA Finals kheltu Anisimova a chesual duh tawh bik lo, set khatna a hloh zet hnuah ropui takin a tho chhuak a, player ṭha Swaitek laka a mualpho tawhna chu hnehna hmangin a chhanglet a ni.

Kum 24 mi Anisimova chuan, "Inkhel harsa tak a ni dawn tih kha chu ka hre lawk a, theihtawp chhuah bakah vanneih tel a ngai tih pawh ka hria. Mak tak maiin ka hlauthawng lo a, nuamti takin ka inkhel tawp mai a ni," tiin a sawi.

Inkhel dangah Rybakina chuan Ekaterina Alexandrova chu 6-4, 6-4 in a hneh a, seeded parukna ni mah se group match an khelh zawh meuh chuan a chungnung ber a, semifinal-ah group lemlama pahnihna nen an inkhel ang.