Sports minister leh Red Bull aiawhte inkawm

Nimin khan Mizoram sports leh tourism minister Lalnghinglova Hmar (Tetea Hmar), Red Bull Aizawl Tlang Ruam 2025 buaipuitu Red Bull aiawhte leh mentor pahnih - khawvel huapa mountain biker langsar - Tomas Slavik leh Pedro Burns te chuan inkawmna hun an hmang.

Tetea Hmar chuan, "Red Bull zarah mountain biking lama khawvela langsar, world class infiammi kan hmu thei dawn. Khawvel hriatah Mizoram a tilar a, tunah pawh inelnaa tel tur leh a entu turten Aizawl hotel an luah khat deuh vek tih thu ka dawng a, a lawmawm takzet a ni. Sports leh tourism hi thil kal kawp tlat a ni a, Mizoram sorkar chuan a theihna apiangah puih zel kan inhuam," a ti a; Red Bull India aiawhte chuan Mizoram sorkar puihnaah lawmthu an sawi.

Tourism minister chuan sawi chhunzawmin, "Tourism aṭanga thlir pawhin inelna hi a pawimawh hle. Tun aia nasa zawk hian khualzin hipna ṭha ni bawk turin he inelna hi a kalpui theih a, tourism calendar-ah pawh telh ngei a ṭha," tiin a sawi.

UCI Four-Cross World Champion vawi li ni tawh Tomas Slavik leh Chilean rider Burns te hi nikum khan an rawn kal tawh a, kuminah pawh an tlan ve dawn a, anni erawh inelnaah an tel ve lo thung. Slavik chuan, "Ka phur tawh takzet. Aizawl hi nuam ka ti a, chutihrualin a chhuk ve khawp a, a tlanna tur kawng kan zawh hian kawng tam tak chu ka tlan ngam lo. Tun ṭuma tlanna tur pawh hi a awlsam lo ang," tiin Vanglaini a hrilh. Burns pawhin, "Tlan dawn chiah hi chuan ka la zam ve reng, mah se han tlan tawh hi chuan ngaihtuahna zawng zawng kan seng a, a nuam ka ti," tiin a sawi ve bawk.