A duh apiang tan en theih

Red Bull Tlang Ruam hi a duh apiang tan a en theih a, en man a awm lo. Kalkawngah hian dai danna an dah ang a, chumi sir aṭang chuan a en theih zel dawn. Red Bull lam chuan, "Helaia chengte tan harsatna kan siam a, kawng te kan dansak a, an tan thil ṭha kan tih let hi kan bat a ni. Ennawm hmuhnawm a thlawnin kan chhawpsak dawn a, a ṭha thei ang berin inelna kan buatsaih ang," tiin Vanglaini an hrilh.

Nikum khan hlawhtling takin neih a ni tawh a, kuminah pawh ngaihven a hlawh. Inelna neihna hmuna chengte ringawt pawhin en se, entu mawi tham an awm dawn. Chutihrualin Asia khawmualpui huap inelna a nih avangin hmaih phal chi a ni lo a, a thlawn veka en theih a nih bawk avangin a hmun ngeia en a pawimawh a, damchhung sawi tling tur a ni.

Tun ṭum Red Bull Tlang Ruam budget hi nuai 300 a ni a, hetianga event lian neih theih nan Miller B. Renthlei a pawimawh a, youtube lama a video phochhuah bakah a hmalakna zarah Aizawlah inelna lian a awm theih phah. Red Bull hi Mizoram Cycling Association (MICA), Sports & Youth Services Department leh Tourism Department te nen an thawk ho a ni.