Arsenal-in Sunderland tlawh dawn

Zanin dar 11:00 hian Arsenal-in Stadium of Light-ah kai thar Sunderland an hmachhawn dawn. Black Cats hi kai thar ni mah se table-ah palinaah an awm a, champion lai Liverpool nen an point hmuh zat a inang.

Sunderland hi Régis Le Bris hoin beisei phak bakin an che ṭha a, Arsenal player hlui Granit Xhaka-a'n hmun pawimawh changin, French striker Wilson Isidor-a'n league-ah goal li ngawt a khung tawh.

Mahse, an khingpui tur Arsenal erawh Mikael Arteta hnuaiah an vanglai hun an hmang mek. Gunners defender hlui Martin Keown pawhin, "Arsenal-in Invincibles team angin an 'attack' a, class of 97-98 angin an goal an venghim," tiin a fak hle.

Arsenal hian league match 10 an khelh tawhah goal thum chiah an la chhuah a, league match hnuhnung paliah goal an chhuah tawh lo a, tun season-ah vawi sarih ngawt clean sheet an nei. Champions League-ah an record a ṭha lehzual - match liah chak vekin goal an la chhuah lo a, goal 11 ngawt an khung tawh a ni.