Rooney-a'n Maresca thutlukna mak a ti

Manchester United captain hlui Wayne Rooney chuan Chelsea manager Enzo Maresca-a'n player a thlak nasa lutuk chu mak a ti a, senior player-te pawhin manager an chhuahchhal ve a ṭul thu a sawi.

London club hi Nilaini zan khan Champions League-ah Qarabag nen 2-2 in an inhnehtawk a, Maresca hian Tottenham hnehtu team aṭangin starting XI-ah player pasarih ngawt a thlak.

Rooney chuan, "Player chuan khelh an duh a, an khelhpuite nen inhriatchian an mamawh. A ṭhen paih a, thlak kual reng chuan player an lawm thei lo. Chutihrualin result a ṭhat reng chuan a sawisel theih loh a, a ṭhat loh erawh chuan a chhuahchhal theih thung," tiin a sawi.

England striker hlui Rooney chuan sawi chhunzawmin, "Club tam tak chuan senior player awmna khawmna group te an nei a, group anga intel khawmin manager an dawr ṭhin. Mi ṭhenkhat chuan player ho thuneihna tiin an sawisel ṭhin a, mah se player thuneihna lam a ni lo. Kei chu ni ila, team inthlak reng avang hian ka lawm lo ang," tiin a sawi a, captain Reece James leh kum upa zawk player-te chu hemi chungchanga manager dawr turin a fuih.

Chelsea hian tun season match 16-ah vawi 85 player an thlak danglam tawh a, Premier League team-a player siksawi nasa ber an ni. London club hian zanin dar 1:30 hian Stamford Bridge-ah Wolves an mikhual ang.