Aston Villa an chak awlsam

Europa League inkhelah Aston Villa an chak leh ta a, an nikhual Maccabi Tel Aviv chu 2-0 in an hneh - Villa tan Ian Maatsen leh Donyell Malen (penalty) ten goal khat ve ve an khung a, Europa League match li an khelh tawha vawi thum an chakna a ni.

Maccabi Tel Aviv hi Israel club an nih avangin, inkhelh hmain khelmual chanchin aiin a pawn lamin titi a luah hnem zawk a, tun laia Israel leh Palestine buaina avanga Israel chet dan duh lotu tam takin Israeli club hi an lo dodal.

Birmingham khawpuia inkhelah hian West Midlands Police te chuan mi 11 ngawt an man thu an sawi hial a, police 700 zet chu Villa Park-a inkhelah buaina a chhuah hlauin an duty hial a ni.

Maccabi manager Zarko Lazetic chuan, "Police-ten thurawn min pek angin, inkhelh hma darkar chanveah khan khelmual kan thleng tawh a ni," a ti a, buaina chhuak thei lakah inveng chunga khelmual an pan thu a sawi.

Aston Villa tan Ningani zan inkhel hi Liverpool laka 2-0 a an tlawm hnua an match khelh leh hmasak ber a ni a, khel ṭha tawk lo mah se, a pawimawh ber point thum an hlawh chhuak - Pathianni zan dar 7:30-a Bournemouth an mikhual tur atan an inringtawk sawt ang.

Villa hi an league match hmasa pangaah an chak zo lo a, a hnu match liah a zawnin an chak thung - an hneh zingah Tottenham Hotspur leh Manchester City an tel a, mahse, a tawpah Reds an ngam lo.

Europa League lamah insiamṭha leh zuiin, league lamah chak result an hlawhchhuah leh theih an inbeisei ang.