Diaz kha red card tur a ni lo - Toni Kroos

Real Madrid midfielder hlui, inkhelh chawlhsan ta Toni Kroos chuan Bayern Munich leh Paris Saint-Germain inkhela Luis Diaz-a red card chu a thlirkir a, referee chuan thutlukna a siam sual thu a sawi.

Diaz hi PSG fullback Achraf Hakimi lakah a foul a, Hakimi hi a inhliam zui - kar riat zet a hliam vang hian a chawlh a ngai dawn. Diaz hi a tirah yellow card pek a ni a, mahse, referee Maurizio Mariani-a'n video assistant referee (VAR) a rawn hnuah red card a pe leh ta zawk.

Mahse, Kroos erawhin Mariani thutlukna hi a pawmpui lo a, Bayern tan pawha lo khel tawh ṭhin midfielder hlui chuan, "Ka ngaihdanah chuan red card tur a ni lo. Referee khan thil thlen dan aiin Hakimi inhliam kha thutlukna siam nan a hmang a ni.

"Hakimi kha inhliam lo ngat se, tumahin review pawh an en kher lo ang," a ti a, Diaz chuan tihsual a neih loh thu a sawi - Liverpool forward hlui Diaz hian he inkhelah hian goal hnih a khung hman tho a, champion lai PSG lakah a team hi 2-1 in hnehna a chanpui.

Diaz hian inkhelh zawh lamah, "Kan rilru zawng zawng pein kan inkhel a, minute 90 chhungin thil chhe ber leh ṭha ber a thleng thei tih football-in min hriattir leh ta.

"Ka ṭhiante a tawp ka kharpui thei lo a pawi ka ti a, an khelh dan erawh ka chhuang thlawt. Hakimi pawh dam thuai turin duhsakna ka hlan e," tiin social media lamah a tarlang tawh.

Kum 28 mi forward hi Bayern a pan hnuah hma a sawn lehzual em ni chu aw, tih mai tur a ni a, tun season inelna hrang hrangah match 16 khela goal 10 khungin, assist vawi nga a nei tawh.

Bayern hi tun season-ah Europe-a team hmuhnawm ber pawl an ni a, inelna hrang hrangah match 16 zet chu a zawnin an chak tawh - zanin dar 8:00 hian league match khel turin Union Berlin chu khualmualah an lenchilh ang.