Roma-in Rangers an hneh

Europa League inkhelah AS Roma chun 2-0 in Rangers an hneh a, Matìas Soulè leh Lorenzo Pellegrini te chuan goal khat ve ve khungin, Scottish club-in a chhanletna tur an nei lo.

AS Roma tan Europa League match li an khelha vawi hnih an chakna chiah a ni a, vawi hnih an lo tlawm tawh bawk. Rangers erawh tun season-a Europa League match li an khelh tawhah an la tlawm vek a, team 36 inelnaah a mawngphah an luah mek.

Rangers hian tun season-ah beisei an phak lo a, Europa League chauh ni loin, league lamah pawh an talbuai hle - hei vang hian coach thar an dap a, Steven Gerrard pawh an dawr hman.

Mahse, Stevie G-a'n Scottish Premiership nomawi meuh a lo chawipui tawh hi hnarin, Danny Röhl an la lut. Mahse, Sheffield Wednesday boss hlui hnuaiah hian match nga khel tawhin, vawi hnih chiah an la chak a, vawi thum an tlawm.

Hetihrual hian coach thar Gian Piero Gasperini hoa season bul ṭantu AS Roma tan erawh Rangers lakah result lawmawm bik a awm a, Scottish club goalkeeper Jack Butland che ṭha hle lo se, goal tam zawk khung thei an ni!

Roma hian Europa League-a an match hmasa berah Nice chu 1-0 in hneh mah se, Lille (1-0) leh Viktoria Plzen (2-1) lakah a zawnin an tlawm a, tunah hnehna an chang ve leh ta hi an thaw huai ang.

Serie A lamah pawh Roma hi an che chhe hran lo a, table-ah palina ni mekin, pakhatna Napoli chu point khat chauhin an phak lo mek. Hetihlai hian an match hnuhnung berah AC Milan chu 1-0 in an ngam lo a, Pathianni zan dar 10:30-a Udinese an lenchilh hunah Europa League-a an result ṭha hi chhawm nun an beisei ang.