Eric Garcia dinhmun a chiang lo

Barcelona centre back Eric Garcia chu Champions League-a Club Brugge nen an inkhelah a inhliam a, he thu buatsaih a nih lai hian Pathianni zan dar 1:30-a Celta Vigo an lenchilh hunah a inlan theih dawn leh dawn loh a la chiang lo.

Catalan club hian Champions League match-ah rin loh takin Club Brugge chu 3-3 in an inhnehtawkpui a, he inkhelah hian Eric Garcia hi hnar thi avangin lakchhuah a ngai.

Barcelona chuan a hnuah thuchhuah siamin, "Eric Garcia hnar ruh a tliak a, hei vang hian protective mask a vuah a ngai dawn. Celta Vigo nen kan inkhel turah a inlan theih dawn leh dawn loh a chiang lo," an ti.

Hansi Flick-a'n player hliam a kawl nual a, tun dinhmunah Joan Garcia, Gavi leh Raphinha te chu hliam vangin an chawl mek bawk - international break zawhah erawh keeper Garcia leh Raphinha te chu lo kir hman tura beisei an ni.

Hetihlai hian tun season-a Barca squad-a hmun pawimawh chang Eric Garcia hi Paris Saint-Germain chuan lakluh tumin an hel dawn nia sawi a ni a, coach Luis Enrique mit a tlung hle niin an sawi.

Kum 24 mi centre back hian Nou Camp-ah kum 2026 thleng khel turin contract a nei mek a, contract thar a ziak a nih loh chuan January-ah a duh zawng club be turin zalenna a nei dawn tihna a ni.

Barcelona boss hlui Enrique hian Spain national team a enkawl laiin Garcia hi a lo hre chiang tawh a, hei vang hian PSG tlarhnung tiṭha thei turah a ngai.

Hetihlai hian Barca erawhin an defender hi chhuahtir an tum lo nia sawi a ni a, contract thar ziahpui theih an inbeisei.