Hliam vangin PSG talbuai

Treble champion Paris Saint-Germain damdawi in lun vanglai tak a ni - Bayern Munich laka an inkhelah Achraf Hakimi leh Ousmane Dembele te hliam vangin lakchhuah an ngai ve ve a, Hakimi hi kar riat a chawl dawn nia tarlan a nih laiin, Dembele hma hun a chiang lo.

Ballon d'Or kawltu Dembele tan hliam hi thil thar a ni lo - hliam vangin a nih tur ang ni phak lo ang hiala sawi a ni ṭhin a, tun season-ah pawh hliam vangin a buai ngun leh dawn niin a lang!

French forward hi September khan a malpuiah a inhliam tawh a, tun hnaiah a hliam hi damin a lo kir ve leh chauh a, a chawnah hliam a nei leh ta.

PSG chuan, "A chawn vei lamah hliam a nei a, kar engemaw zat chu a chawlh a ngai dawn," an ti a, international break zawhah an player hliam dinhmun chu chiang taka sawi a nih tur thu an sawi.

French club hian hliam vangin Desire Doue leh Nuno Mendes an chhawr thei lo mek a, Pathianni zan dar 1:15-ah league match khel turin club ṭha Lyon an lenchilh ang.

PSG hian league match 11 khelh tawhah point 24 hmuin hma an hruai mek a, hetihrual hian Marseille leh Lens ten point hnih chiahin an thlau mek thung.