A hlawhtling a, hmasawnna tur a awm - Victor

Red Bull Tlang Ruam tlan kawng bakah hmun hrang hranga tlan kawng duangtu course designer Víctor Heresmann chuan, "Lawmna tur tam tak a awm a, a hlawhtling hlein ka hria. Football leh infiamna bakah concert te chu a thlawnin in en thei dawn lo a, Red Bull Tlang Ruam chu en man a thlawn vek niin heng naupangte hian an damchhungin an hre reng tawh ang. Chu chu keini chuan kan ngai hlu em em a ni," tiin inelna a hlawhtlin thu Vanglaini a hrilh.

Victor chuan sawi chhunzawmin, "Duhthusam maw? duhthusam tih ka sawi lo. Hmasawnna tur a awm zel. Kan tlan kawngah pawh siam rem hret hret tur a awm ang a, Red Bull advertisement kan dahna laiah pawh fuh tawk lo pawh a awm ang. Duhthusam hi chu a awm thei lo a, tun ṭuma mi pawh duhthusam a ni lo a, tun aia ṭhat theih dan tur a awm zel. A tlan hun chungchangah pawh mipui tibuai lo zawk tura ruahmanna siamte pawh a pawimawh ang," tiin hmasawn zel a duh thu a sawi.

Tun ṭum Red Bull Tlang Ruam budget hi nuai 300 a ni a, hetianga event lian neih theih nan Miller B. Renthlei a pawimawh a, youtube lama a video phochhuah bakah a hmalakna zarah Aizawlah inelna lian a awm theih phah. Red Bull hi Mizoram Cycling Association (MICA), Sports & Youth Services Department leh Tourism Department te nen an thawk ho a ni.