Goal thum khungtu Chelsea

Champions League lama chak zo lo hlim Chelsea chu Premier League lamah an insiamṭha nghal a, Inrinni zan khan an mikhual Wolverhampton Wanderers chu 3-0 in an sawp.

Stamford Bridge-a inkhelah Chelsea-in beisei anga inkhel thunun erawh an harsat a, rin loh taka Qarabag nen 2-2 a an lo inhnehtawk tawh avangin, fans an lungawi lo a, chawlhlawk hman laiin an player-te an au el hial!

Blues hian chance nei lo erawh an ni lo - Alejandro Garnacho, Enzo Fernandez leh Joao Pedro ten London club hi hmahruaipui theihna remchang an nei vek a, mahse, an chhawr lo vek thung.

Enzo Maresca nauten chawlhlawkah thu ṭha an ngaithla a, second half-ah an vanduai tawh lo. Minute 51-naah Garnacho siamsak chu Malo Gusto chuan goal hamhruai ni turin a khung a, 1-0 a ni.

Gusto tan he goal hi a hlu bik - a senior professional career-a goal a khung hmasak ber a ni a, match 165 a khel tawh! Chelsea hi kum 2023 khan a zawm a, Blues tana match 98 a khelhnaah chiah goal a khung.

Chelsea-in an duhtawk mai lo. Bench aṭanga luhtir Estevao Willian chuan second 68 chiah khelmualah hun a hmang hman tihin, Joao Pedro khung tur a siamsak a, Garnacho thawhrah sengin Neto chuan a hmawr a bawk thung.

Chelsea an chak a, champion tum zingah an tel tih an pholang nawn. Wolves erawh tun season-ah chak an la nei lo tluang zel a, match 11 khelh tawhah table mawngphah luah mekin, point hnih chiah an la nei!

Wolves hian coach Vítor Pereira chu November 2 khan an ban a, a thlaktu tur an la neih loh avangin academy coach pahnih James Collins leh Richard Walker kaihhruaina hnuaiah Stamford Bridge hi an leng a ni.