Mizoramah hockey kum 100 tlin an lawm

Indian hockey-in kum 100 a tling a, ram chhung hmun hrang hrangah lawm a ni. Mizoramah pawh Zirtawpni khan hun hma a ni a, hemi hma pawh hian district ṭhenkhatah chuan hun hman a lo ni tawh bawk.

Kum 1925 November 7 khan Indian Hockey Federation a lo piang a, kum 2009 aṭang khan tun thlenga hman zui tak Hockey India tia thlak a ni.

India rama hockey kum 100 tlin lawmna programme hi Mizoramah chuan, a ni dik tak November 7 chu school naupang exam lai a nih vangin November 1-ah Kolasib District leh Siaha district ten an hmang a; November 5 khan Aizawl, Saitual leh Serchhip District ten an hmang leh a, November 7-ah Hnahthial, Lunglei leh Mamit District ten an hmang thung a ni.

Aizawl District bikah hian Hockey Mizoram hruaituten programme an hmanpui a, MSSC Muallungthu Hockey Ground ah hman a ni.

Hockey India-in a ruala hockey match 1000 khelh tura ruahmanna bawhzuiin, Mizoramah pawh match 14 khelh a ni. Inkhelhnaah hian a bik takin Aizawl district bikah senior women match neih a ni a, player-te hi kum 1980 chho vela hockey lo khel tawhte an ni hlawm.

India hian hockey huangah a zawnin Olympic gold medal ṭum ruk a la tawh a (Amsterdam 1928, Los Angeles 1932, Berlin 1936, London 1948, Helsinki 1952 leh Melbourne 1956) a ni.

Tun dinhmunah India hi FIH ranking-ah mipa team te pangana ni mekin, hmeichhe team chu pangana an ni thung.