Berlin-in Bayern Munich an chelh

Tun season inelna hrang hrangah match 16 zet a zawna hnehna an chan hnuin Bayern Munich chu chelh dinin an awm ve ta - Inrinni zan khan an mikhual Union Berlin nen 2-2 in an inhnehtawk.

Mualneitu Union Berlin hian vawi hnih ngawt hmahruaitu dinhmun an chelh hman hial - minute 27-naah Danilho Doekhi chuan Berlin tan goal hmahruai khungin Bayern a barakhaih.

Mahse, German champion hi an hnufual rei lo. Minute 38-naah Luis Diaz chuan a thiam thil 'show' in, out mai tawh tura lang ball chu lain, a sir aṭangin mawi zetin si phurh sutna goal a khung.

Liverpool aṭanga Bayern pantu Diaz hi Germany a pan hnuah a ṭha lehzual a ni ber a, tun season inelna hrang hrangah match 17 khelin goal 11 ngawt a khung ta - assist vawi nga a la nei tel cheu bawk.

Bayern tan striker chhuanvawr Harry Kane a reh a, English striker a talbuai zui - minute 83-naah Union Berlin freekick pet aṭanga ball kal chu Doekhi ke bulah tak a tauh thla a, kum 27 mi centre back hian goal-ah a chantir.

Tun season-a a vawi khat nan Bayern an tlawm ngei dawn niin a lang a, an hlauthawng. Mahse, hun pek belh minute thumnaah Kane a inlar a, English striker hian a tihsual thaibo nan Tom Bischof-a siamsak chu goal-ah a chantir - hun a tawp zui a, Bayern chak zo lo mah se, point an hlawhchhuah hram avangin an lawm ang.

Union Berlin-in hun rei zawk Kane an dah ṭha thei a, a tawpah erawh striker ṭha bik danglamna a lang a, a chance neih a hlah lo - Kane hian tun season inelna hrang hrangah match 17 khel tawhin goal 23 a khung tling ta der a, assist vawi thum a nei bawk.