Atletico Madrid an kal zel

Diego Simeone-a enkawl Atletico Madrid-in season ṭantirah beisei phak lo mah se, champion an la tum ve zel tih pholangin, a zawna a vawi li nan league-ah an chak ve leh ta - an mikhual Levante chu Inrinni zan khan 3-1 in an hneh.

Mikhual Levante hian minute 21 chhungin goal hnih an khung hman a, mahse, an goal pakhat zawk erawh centre back Adrian de la Fuente-a'n Atletico lamah ni loin, anmahni lama a tihluh a ni.

Real Madrid academy chhuak Dela-a'n an lama a tihluh hnuah hian Manu Sanchez chuan Levante tan si phurh a sut ve leh a, goal dang lut loin chawlhlawk an hmang.

Team pahnih hi 1-1 in an inhnehtawk reng a, Simeone-a'n minute 61-naah thutlukna fuh lutuk a siam - Pablo Barrios la chhuakin, Antoine Griezmann a luhtir a, French forward hian danglamna a thlen zui.

Kum 34 mi hian Atletico tan goal hnih khung zuiin, a team hi 3-1 in hnehna a chanpui - second 28 lek khelmualah hun a hmang hman tihin goal a khung nghal a ni. Griezmann hian tun season inelna hrang hrangah match 16 khelin goal nga a khung tling ta chiah.

Atletico-in hnehna an chan avangin table-ah palina dinhmun an sawh nghet a, Barcelona nen an point hmuh zat a inang tawh.

Mahse, Barca hi nizan khan an inlan a, Real Madrid pawh an inlan - an result kan hre hman lo a, he thuziak i chhiar meuh chuan an point hmuh zat hi a danglam leh tawh hial ang.