Everton an chak ve leh ta

Premier League match thum zet a zawna hnehna an chan zawh tawh loh hnuah Everton an chak ve leh ta a, an mikhual Fulham chu 2-0 in an hneh - Idrissa Gueye leh Michael Keane ten goal khat ve ve an khung a, Fulham lamin a chhanletna tur an nei lo.

Everton khelmual thar Hill Dickinson Stadium-a inkhelah mualneitu team an vanduai leh ngei dawn niin a lang hman a, Thierno Barry leh James Tarkowski ten goal hmahruai an khungah inngai ve ve mah se, offside vangin pawmsak an ni lo ve ve.

Mahse, first half hun pek belhah Gueye chuan goal hmahruai a khung a, 1-0 in chawlhlawk an hmang. Second half ṭantirah Kiernan Dewsbury-Hall-a'n a khung belhah inngai mah se, offside vang bawkin pawmsak a ni lo.

Mahse, minute 81-naah Keane chuan an goal hnihna a khung leh a, hun tawp a hnaih tawh avangin Fulham tan comeback a harsa tawh - mahni mualah Everton an chak a, David Moyes a thaw huai ang.

Fulham tan hian Rodrigo Muniz chuan khung goal khung theihna remchang nei ve mah se, Jordan Pickford-a'n ṭha zetin a dansak a, Kevin-a hun ṭha neih chu Ndiaye chuan engmah lo maiah a chantir bawk.

Everton-in hnehna an chan avangin table-ah 11-naah an chho a, Fulham erawh relegation zone aṭanga an himna chu point khat chauh a ni mek - league match 11 an khelh tawhah vawi thum chiah an la chak a, vawi hnih draw neiin, vawi ruk an tlawm tawh!