Milan leh Juventus an chak zo lo

AC Milan chuan Serie A hmahruai fal theihna remchang an neih chu an bawhpelh. Inrinni zan inkhelah Parma nen 2-2 in an inhnehtawk a, champion lai Napoli nen point 22 ve ve an hmu - Naples club hian match khatin an khel tlem thung a ni.

Inkhel dangah Juventus chuan an boruak fuh an chhawm nung thei bik lo, an mikhual Torino nen goal awm lo, 0-0 in an inhnehtawk - Old Lady hian point 19 an hmu thung a, champion turin beiseina an nei ngam leh der tawh a ni.

Stadio Ennio Tardini-a inkhelah, mikhual Milan lamin Alexis Saelemaekers leh Rafael Leao te goal hmangin hma an hruai a, an dinhmun pawh a ṭha hman hle. Mahse, muanleitu lamin Adrian Bernabe leh Enrico Delprato te hmangin an sut zo.

Milan manager Max Allegri chuan, "Point thum hmuh theih chiangsa tawha ngaihah khan point hnih chu holam takin kan paih bo leh chiang a ni. Goal kan chhuah a ni satliah lo a, second half kan khelh dan kha chu a ṭha lo hle," a ti.

Juventus pawh coach Igor Tudor an ban hnuah boruak siam ṭha viau mah se an chak reng thei bik lo. Luciano Spalletti enkawlna hnuaiah goal an khung loh avangin an mikhual Torino nen point khat ve veah an lungawi a ngai.