Football club an fimkhur lo: Premier League a nghing?

Covid-19 vangin khawvel a buai a, khawvel ram ropuite meuh pawhin kut silfai, hmai tuam leh in lama tawm bak he natna do dan an hre meuh bik lo. Chutiang boruak chuan infiamna khawvel pawh a nghawng lo thei lo. Mahse, infiamna hi mit ti tlaitu a ni satliah lo - chhungkaw tam takin innghah nan an hmang a, infiamna rei tak chawlhsan ringawt chu mi chaw thleng ben buak sak ang chauh a ni. 

Thuneitute pawhin mi tam tak eizawnna a ni tih hriain fimkhur takin infiamna hrang hrang kalpui chhunzawm dan an ngaihtuah a, dan tam tak zam chungin inelna an kalpui.

Mahse, English football bikin tun hnaiah Covid-19 dan zamte an zawm ṭha tawk lo a, sorkar thuneitu tam takin hei hi an sawisel - Premier League thlenga tihtawp leh rih mai thlengin a ri leh ta!

Tun hnaiah FA Cup third round khelh a ni a, team ṭhenkhatin dressing room chep taka an chak lawm lai thlalak an pho chhuak a, hmun ṭhenkhatah fans an pungkhawm bawk.

Hei hian sorkar beng a thleng thuai a, an tan enliam mai mai a harsa - football tihtawp lailawk an sawi ri leh ta a, hei hi an kaltlangpui a nih ngat chuan rei tak chhung Premier League en tur a awm lo leh dawn tihna a ni. 

Premier League bikah chuan referee-ten inkhelh hmain club captain leh manager-te an bia ang a, social distancing dan awm sa chu zawm turin an hrilh ang - heng zingah hian goal khung lawm avanga inkuah khawm leh inchibai thlengin a tel. 

English top flight league hnuai lam enkawltu, English Football League chief executive thar Trevor Birch chuan Thawhṭanni khan club ho hnenah lehkha a thawn a, an fimkhur loh reng chuan sorkar aṭangin pressure an neih mai a hlauhthawn thu a ziak. 

Covid-19 hri a len hnuah UK bikah mi 80,000 chuangin coronavirus avangin nunna an chan tawh a, hetiang a nih avang hian England-a lockdown dan khirh zawk kalpui thlengin sawi rik a ni leh tawh.

Hetiang karah hian infiamna chu kalpui reng a ni a, mahse, tun hnaiah infiammiten dan an zawm ṭhat tawk loh avangin infiamna pawh chawlh rih mai rawtna a awm ṭan leh ta. 

FA Cup lamah beisei loh result nei club an awm nual a, club ṭhenkhatin an hlimna leh lawmna thup har tiin dressing room lamah inhnaih tak takin chak an lawm - social media lamah a darh leh bawk si a, sawisel loh theih pawh a ni lo. 

Tottenham Hotspur leh Marine inkhelah fan-ten stadium an luh phal ni lo mah se, fans ṭhenkhat erawh an pungkhawm tho a, Merseyside Police-te chuan, "Fans pungkhawm tam zawk chu social distancing zawm chungin an kal a, chutiang zawm lote pawh midang hnaih lo tura hrilhriat an ni," tiin an sawi. 

England-ah Covid-19 vangin tun season-a football match khelh tur ṭhulh zat chu 60 a tling a, heng zingah hian zanina Spurs leh Aston Villa-ten Premier League match an khelh tur chu a tel. 

Premier League club zingah Spurs, Fulham, Crystal Palace, West Ham leh Manchester City-te chuan kum thar chawlh laia dan bawhchhia an player-te chu na takin an lo sawisel tawh. 

Women's Super League lamah chuan Arsenal-in Aston Villa an lenchilh tur leh Manchester City-in West Ham an mikhual tur chu player pangain coronavirus an kai avangin ṭhulh a ni. 

Dubai-a Krismas chawlh hmang, City player pali chuan Covid-19 an kai a, Arsenal player zin chhuak pathum zinga pakhat chuan a kai bawk a, Manchester United boss Casey Stoney chuan chawlh laia Dubai lama a player-te zinchhuah a phalsak chu a thiam loh a nih thu a lo sawi tawh bawk. 

January kar hmasa bera Covid-19 test neihah player leh staff 40 ngawtin hri an kai a, hei vang hian Premier League chuan dan zawm tur khauh zawk a siam thar. 

Player leh manager-te chu ṭul loa inkawm tam lo turin hriattir an ni a, player-ten dan an zawm leh zawm loh enfiah tura ruat officer chuan dressing room-a an awm dan thlengin an en reng ṭhin ang. 

Hei mai a ni lo - officer chuan player-te hotel-a an awm chhung leh an zin dan thlengin a en ang a, training ground-a staff awm thei zat pawh tih tlem a ni bawk. Match a awm reng rengin a hma aia fimkhur lehzual tur a ni a, ṭul loa player-te chu inhnaih lo tur leh substitute-te chu hmai tuam uluk lehzual tura tih an ni. 

Premier League-a player-ten kar khata test vawi khat an neih ṭhin chu round hnih tih a ni tawh a, EFL lama player leh staff-te pawh kar khatah vawi hnih test neih tawh tur a ni - EFL lama test neih hnuhnung berah khan club 66 aṭangin mi 112 an positive. 

Arsenal manager Mikel Arteta chuan, "Game hahthlak tak khelh a, goal khung lawm theih loh lai hi zawm a harsa khawp ang," a ti a, an player-te chu corner-ah player ven bik nei tura an tih ṭhin bawk si avangin inkhelh laia social distancing chu thil harsa tak a nih thu a sawi. 

Manchester City boss Pep Guardiola chuan, "Player pakhatin goal a khung a, a goal khung lawm loh chu a harsa ngawtin ka ring. Player-in goal a khung rualin a ṭhiante a lawmpui theih leh theih loh a ngaihtuah hmanin ka ring lo," a ti. 

Wolverhampton Wanderers manager Nuno Espirito Santo  chuan, "Ka hlauhthawn ber chu inkhel chawlh lailawk a ngai leh ang tih hi a ni a, fixture a hautak dawn lutuk," a ti a, fimkhur a ngaih thu a sawi. 

Sheffield United manager Chris Wilder chuan, "Mi zawng zawngin kan dinhmun an hria a, tihtawp a ni ngai rih a nih pawhin a mak ka ti lo ang," a ti!

English Football League chief executive Trevor Birch chuan, "Hri len chhung zawngin football hian mi maktaduai tam tak tan beiseina a siamsak a, chutihrual chuan enthlak kan ni reng tih erawh kan hrethiam. 

"Hei vang hian club-te chu fimkhur lehzual turin ka chah duh a, ruahmanna leh dan awmsate khauh lehzuala kalpui turin ka ngen a ni," a ti a, inkhelh chhunzawm theih chu mi tam tak tan a pawimawh thu a sawi. 

BBC sports editor Dan Roan chuan, "Infiamna khawvel hi titawp rih tura hmalakna a la awm rih lo a, sawi ang ema hlauhthawnawm a la ni rih lo. Chutihrual chuan tihtawp a ni lo ang, tia sawi ngawt a ngamawm loh bawk," a ti. 

Arsenal boss Arteta chuan, "Kan ram leh khawvel hmun dang dinhmun ngaihtuaha kan la kal reng thei hi a mak zawk a, him taka infiamna hi kan kalpui thei reng a nih chuan khawtlang tana kan pek theih chu kan hria a ni," tiin a sawi.