MoGrip Supercross-ah Shaun-a pahnihna

MRF MoGrip Supercross National Championship 2025 round 4 inelna chu November 9, Pathianni khan Raipur, Chhattisgarh-ah Shaun Lalremruata Chhangte chu pahnihna niin Mizo hming a ti ṭha hle.

College Veng tlangval Shaun hian mahni sum sengin inelna hi a hmachhawn a, round 4-ah hian Private Expert Class-ah telin pahnihna a ni a, Indian Novice Class-ah palina a ni bawk. Nikum khan Shaun hian inelna hi a lo hmachhawn tawh a, season liam ta khan nomawi pali a rawn hawn a ni.

Tun ṭum round-ah hian bike engine-ah chiang lo a awm a, amah hian a tum em avangin stock engine hmangin a tlan lui a, a elpui bik chak tak tak karah lawmman a a la thei hi a chhuanawm hle. Shaun chuan, "India ram pum huapa nomawi ka chawi thei hi Pathian vang liau liau a ni a, min buaipuitu leh min lo ṭawngṭaipuitute zawng zawng chungah ka lawm hle," tiin a sawi.

Raipur-a inelna a hmachhawn hma hian Vadodara, Coimbatore leh Nashik-ah round hmasa pathum neih a lo ni tawh a, Shaun hian mahni sum seng vekin inelna hi a hmachhawn. Round 5 leh round 6-a tlan turin inbuatsaihna a nei lehnghal dawn a, inelna neih hma hian Mizoramah a rawn haw phawt dawn a, vawiin hian Aizawl a rawn thleng ang.