World Cup khel tur Lalthantluangi

India rama hockey thuneitu sang ber Hockey India chuan FIH Women’s Junior Hockey World Cup 2025 khel tur player a puang a, hming tarlan zingah Lalthantluangi a tel.

November 25 aṭanga December 13 chhungin Santiago, Chile-ah inelna hi neih tur a ni dawn a, India aiawh tur hian player 18 koh an nih bakah, koh leh mai theih tur player pahnih dah an ni bawk.

Mizo tleirawl Lalthantluangi hi defender a ni a, Kanghmun South mi Tluangi hi Thenzawla awm Women's Hockey Academy aṭanga inzir chhuak a ni a, tun hmain kum bitliah inelna huangah India tan pawh a lo feh chhuak fo tawh a ni.

Sports minister Lalnghinglova Hmar chuan lawmpuina thu sawiin, "Santiago, Chile-a FIH Hockey Women’s Junior World Cup 2025 khelh turah Lalthantluangi, Kanghmun South chu India team-ah telin India ai a awh dawn.

"Tluangi ni hi defender a ni a, player pawimawh tak niin penalty corner a dragflick ti ṭhin a ni. Tunah hian Kapurthala Railway-ah a thawk mek. India team leh Tluangi te duhsakna sang ber kan hlan e," a ti.

Nikum khan Tluangi telna India team chuan Women's Junior Asia Cup 2024 an lo la tawh, an champion ṭum hian tlarhnung lamah player pawimawh a lo ni tawh a, tun ṭumah pawh hian India tan ban rinawm a nih leh theih ngei a beisei awm.