A bul ṭan nan Alcaraz a chak

Carlos Alcaraz chuan ATP Finals 2025 bul a ṭan fuh hle - Spanish star hian a match hmasa berah Alex de Minaur chu straight set hmangin a hneh a, world number 1 ni chunga season khar ngei tumin thapui a thawh.

Pathianni zan Jimmy Connors Group inkhelah, seeded pakhatna Alcaraz hian Alex de Minaur chu 7-6(5), 6-2 in a hneh a, hnehna chang tur hian darkar khat leh minute 40 chhung hun a hmang, hartsatna lian tham a tawk lo.

Spanish star hian a vawi thum nan ATP Finals hi a khel, kum 2022 khan tling mah se hliam vangin a khel thei lo. A inlanna hmasa berah semifinal a thleng a, ṭum dangah erawh group stage a paltlang lo thung.

Kum 22 mi Alcaraz chuan, "Tun hnai season thum chhung chu tournament hnuhnung ber atan ka rilru leh taksa a inpeih tawk lo ṭhin, kuminah erawh phur leh thatho takin Turin khawpui ka pan ve thei ta a ni.

"Ṭha leh ropui taka tennis khelh chhuah leh ngei ka tum a, tih theih ngei pawh ka inring," a ti. A thiam zual pariat inelnaah hian Alcaraz hi a la champion ngai lo, kuminah a vawi khat nan hlawhtlin ngei a tum.

Jimmy Connors Group-ah hian, seeded pakhatna Alcaraz, Taylor Fritz, Alex de Minaur leh Lorenzo Musetti te an awmkhawm, an inkhelh kual vek hnuah a sang zual pahnih ten semifinal an lut ang.

Bjorn Borg Group-a inkhelah, seeded pathumna Alexander Zverev chuan Ben Shelton chu 6-3, 7-6 (8-6) in a hneh - American star Shelton hi a vawi khat inlanna a ni a, vawi hnih champion tawh Zverev nen an boruak a inang thei lo a ni.

Tennis season kal laia tournament hnuhnung berah hian Novak Djokovic chu hliam vangin a inlan ve thei lo; Serbian star a inhnuhdawh takah chuan Lorenzo Musetti chuan hmun a chan leh phah ta thung a ni.