Hmeichhe cricket an ngaihven thar

India-in tun thla thir khan a vawi khat nan ICC Women's World Cup-ah an champion a, hmeichhe cricket inelnain ngaihven a hlawh phah hle. Nakkum hian England leh Wales ten T20 World Cup an thleng dawn a, ticket zawrh ṭan tawh niin India champion zawhah ticket an hralh thei sawt.

Inelna hi June 12 aṭanga July 5, 2026-a neih tur a ni a, India champion hnuah 171% in ticket hralhna hi a pung. Women in Blue inkhel tur bik ticket hralhna phei chu 265% in a pung hial.

India-in final-a an hmachhawn South Africa chu nakkum June 21 khian Old Trafford-ah an hmachhawn nawn dawn a, semifinal-a an hneh Australia pawh June 28 khian Lord's-ah an hmachhawn leh dawn. Heng inkhel pahnih ticket hi an hralh ṭha hle.

Tournament director Beth Barrett-Wild chuan, "India rama Women's Cricket khelh zawhah nakkuma neih tur T20 World Cup ticket hralh a kal hle. Hmeichhe cricket-in ngaihven a hlawh thar a, kawng dik a zawh mek zel a ni," tiin a sawi.