MBA Senior Ranking Tournament: Saitluangpuia leh Lalrinkimi an champion

Yonex-Sunrise MBA Senior Ranking Tournament 2025 chu khelh zawh a ni leh ta a, New Serchhip Badminton Hall-a neih inelnaah hian Saitluangpuia Sailo chu mipa champion niin, women's singles-ah Lalrinkimi a champion thung.

November 4-8 a neih inelna hi New Serchhip Badminton Club leh Mizoram Badminton Association ṭangkawpin an buatsaih a ni a, Mizorama player ṭhate piah lamah phai lam academy-a awm Mizo shuttler ṭhate an inlan.

Unau final

MBA Senior Ranking Tournament-ah hian thil danglam a thleng a, chu chu men's singles final-a unau, Ramhlun Venglai rawlthar pahnih Saitluangpuia Sailo leh Sainunmawia Sailo te an intawng chu a ni.

Sihphir Badminton Club (SPBC) hminga inlan unaute hian final lut turin match hautak an paltlang a, final-a an intawn meuh erawh chuan upa zawk chungnunna langin, Saitluangpuia'n 21-11, 21-10 in hnehna a chang.

A hming Rinkimi

Mission Veng tleirawl Lalrinkimi'n kut ruaka Serchhip hawsan a tum lo a, senior level-a a vawi khat nan champion nomawi a chawi - a hre reng tawh ang.

Mission Veng Badminton Academy (MVBA) hminga inlan Rinkimi hian final-ah Chanmari Shuttlers Club (CSC) tana khel Laldingpuii a hmachhawn a, 21-5, 21-14 in, harsatna lian tham tawk loin a chak.

Champion dang

Sainunmawia'n men's singles-ah a u ngam lo mah se, nomawi hlawh chhuak loa haw erawh a duh lo a, mixed doubles-ah Ramngaihzuali nen ṭang dunin, champion nomawi an chawi.

Men's doubles-ah Malsawmhlua (NSBC) leh Vanlalhruaia Sailo (CTBC) ten nomawi an hawn a, women's doubles-ah Zorinkimi leh Liansangpuii, Chaltlang Badminton Club (CTBC)-te an champion thung.