Real goal khung loh zana goal li khungtu Barca

Pathianni zan La Liga inkhelah Real Madrid-in goal an khung thei lo a, an mikhualna ramah Rayo Vallecano nen 0-0 in an inhnehtawk. Real goal khung loh thu hre saa inlan Barcelona erawhin goal li an khung thung a, Celta Vigo chu 4-2 in an hneh.

Liverpool laka tlawm hlim Real-in La Liga-ah hma an la hruai chhunzawm tho a, mahse, anmahni hnaihtu Barcelona aia an sanna chu point li chauh a ni tawh thung.

Barcelona tan hian hliam damkawr Robert Lewandowski chuan hattrick siamin goal thum a khung a, Lamine Yamal chuan goal khat a khung ve bawk - Celta tana Sergio Carreira leh Borja Iglesias goal khungin awmzia a nei phak lo.

Catalan club midfielder Frenkie de Jong chu hun pek belhah hnawhchhuah ni mah se, Barca-in an tuar hman tawh lo a, hun a tawp zui avangin 4-2 in an chak ta tho a ni.

Real an nil

Xabi Alonso enkawl Real-in Pathianni zana Vallecano khelmuala an len hmain point hloh vawi khat chiah an la nei a, mahse, Anfield-a goal an khung theih loh hnuah La Liga lamah thawnthu an her danglam thei chuang lo.

La Liga top scorer ni mek Kylian Mbappe pawhin goal a khung thei lo a, tun season inelna hrang hranga goal 18 ngawt khung tawhtu striker hi a match hnuhnung pahnihah a 'NIL' tihna a ni.

Liverpool laka shot nei miah lo Vinícius Júnior pawh La Liga lamah a nil chhunzawm a, tun season zet chu khelmual chhung aiin a pawnah chanchin a ngah zawk rih a ni ber e!

Real tan ven loha awm centre back Raul Asencio-a'n chance duhawm nei mah se, a hun ṭha neih goal-ah a chantir thei lo a, hun tawp thlenga team pahnihin goal khung an harsat avangin, 0-0 in inkhel a tawp.

Goal a sur

Real Madrid chak zawh loh thu hre sain, khualmualah Barcelona an leng lut a, goal khung turin hun an mamawh rei lo - minute kuana lekah penalty an hmu a, Robert Lewandowski chuan goal-ah a chantir nghal.

Mahse, Barcelona hmahruai chhung a rei lo. Marcus Rashford-a'n a chance neih a hlah hnu lawkah counter attack hmangin Celta Vigo-in an nawr let a, minute khat hnu lawkah Sergio Carreira hmangin si phurh an sut.

Celta khelmualah first half a hmuhnawm thlawt - Barcelona tan Lewy-a'n minute 37-naah khung lehin, 2-1 in a team hma a hruaipui a, mahse, Borja Iglesias chuan minute 43-naah si phurh a sut ve leh zui!

Mahse, Barcelona-in hmahruai loa chawlhlawk hman an duh lo - first half hun pek belhah Lamine Yamal inlar ve lehin, an goal thumna a khung a, 3-2 in chawlhlawk hman a ni.

Hello Lewy

Real-in goal khung an harsat laiin Barcelona erawhin first half-ah ringawt goal thum an khung a, mahse, si hnih an chhuah tel avangin an dinhmun erawh a him chuang lo. Minute 73-na a ni a, Lewy bawk a inlar.

Kum 37 mi striker hian a la tar lo tih pholangin, Marcus Rashford-a corner aṭanga ball kal chu a tauh lut a, La Liga-ah hattrick vawi thum a siamna chiah a ni - Bundesliga lamah Bayern Munich leh Borussia Dortmund tana inlanin, hattrick vawi 16 ngawt a lo siam tawh bawk.

Lewy hi tun season-ah hliam vangin a talbuai a, inelna hrang hrangah match 12 khel tawhin, goal sarih a khung ta chiah - match liah chiah bul a la ṭan tih ngaihtuah chuan a record hi a ropui hle.

Lam hmaih theih loh chu Rashford a ni - English forward hian goal khung lo mah se, assist vawi hnih a nei a, Barca a pan hnuah match 16 a khelh aṭangin goal ruk leh assist vawi kua a nei tawh.