Inter chak zanah Napoli an tlawm

Inter Milan chuan Pathianni zan khan an mikhual Lazio chu 2-0 in an hneh a, inkhel dangah champion lai Napoli erawh Bologna lakah si hnih faiin an tlawm thung - Cristian Chivu enkawl Inter hian point 24 hmuin Serie A hmahruaitu an ni.

Inkhel dangah AS Roma chuan an mikhual Udinese chu 2-0 bawkin an hneh a, anni pawh hian point 22 tho an hmu! Italian football inelna sang berah champion tuma inum boruak a sang dawn hle a, inelna a hmuhnawm chhunzawm ang.

Inter an sang

San Siro-a inkhelah, mualneitu Inter Milan tan Lautaro Martinez chu ṭan aṭanga minute thumna lekah goal a khung ṭan a, second half-ah Ange-Yoan Bonny chuan an goal hnihna leh chak nemnghehna ni bawk a khung.

Serie A hmahruaitu Inter coach Cristian Chivu chuan, "Lautaro Martinez khan a thawhrim rah a seng, tun hnaiah goal hmaah a vannei tawk lo ṭhin a, tun ṭumah erawh kha chuan a phu ang ngeiin goal a khung hma hle.

"Goal khung tum lutuk hian chetsual emaw khelh fuh lo palh emaw hi a awm ve thei, chutiang ni loa nuam ti taka khelh tawp mai hian goal chu a lo kal ve mai ṭhin bawk, ka naute rilru put hmang a dik avangin kan khel ṭha," a ti.

Season hmasa khan Nerazzurri hian Serie A nomawi an kawl lai chu Napoli lakah an chân a, kuminah laklet ngei an tum dawn; season tir lam chauh la ni mah se inelna boruak a sang nghal a, club lian lo zawk laka chetsual loh a pawimawh zual ang.

Inkhel dang

Antonio Conte enkawl Napoli an chesual - Bologna chuan an mikhual Napoli hi Thijs Dallinga leh Jhon Lucumi te goal hmangin 2-0 in an lo hneh a, mikhual Naples club lamin a chhanletna tur an nei ve lo.

An chak loh hnuah Conte chuan, "Bologna khan an khel ṭha em em a, a bik takin an goal an venghim thiam hle. Keini lam khan na taka nawr turin thahrui kan ngah tawk lo, tun hnaia kan result ṭha lo hi chu hna ka thawh ṭhat tawk loh vang a ni," a ti.

Italian manager hian hliam vangin Kevin de Bruyne a chhawr thei rih lo a, Belgian midfielder hi nipui laia an lakluh chauh ni mah se an inkhelh dan kalhmangah dinhmun pawimawh luahtu a nih avangin a awm loh a lang rih hle.

Inkhel dangah AS Roma chuan Lorenzo Pellegrini-a penalty leh Mehmet Zeki Celik te goal hmangin Udinese chu 2-0 in an hneh a, match 11 aṭanga point 24 hmuin AC Milan leh Napoli te chungah an awm a, nomawi chuh ngam tur zinga mi an ni ang.