Hnehna changtu Norris a kal fal

Pathianni zana tlan zawh tak Formula 1 Sao Paulo Grand Prix-ah Lando Norris a chak ber a, McLaren driver hian championship hmahruaitu a nihna chu a sawhnghet zel.

Tun hnaiah Norris hi a zawnin vawi hnih a chak a, intlansiak hmabak pathum an la neihah champion turin a dinhmun a ṭha ta viau, a teammate Oscar Piastri aiin point 24 laiin hma a hruai fal.

McLaren driver pahnihte hi thlamuang taka awm thei erawh an la ni bik lo. Brazil khawpui pakhata intlansiakah hian Max Verstappen chu pathumnaah a thleng a, Red Bull driver ṭha hian a tawp thlengin nomawi hum tumin a bei dawn tih a chiang.

Chutihrualin, Verstappen hian Norris a phak lohna hi point 49 lai a ni tawh a, an inkar a zau deuh tawh avangin Dutch tlangval tan title humhim a harsa tawh mai thei; chutihrualin a hma amite pahnih hi chesual thei reng an la ni ve bawk.

Kum 25 mi Norris chuan, "A nihna takah chuan tun ṭum intlansiakah khan car ṭha leh chak ber kan ni bik lo ang, chutiang chunga hnehna chan theih chu a hlu bik hle. Qualifying aṭangin kan tlan ṭha, a tawpah a rah kan seng ta a ni," a ti.

Nomawi inchuh boruak sawi zuiin Norris chuan, "Kawng zawh tur kan nei thui tawh lo. Amaherawhchu, intlansiak vawi khat chetsual a la pawi thui thei a, tihsual nei loa season tawp hman ka tum ang," tiin a sawi a, hma a hruai mekna chu humhim ngei a tum.

Car intlansiakna sang ber hi tun season chhungin vawi thum an la tlan dawn - Las Vegas, Qatar leh Abu Dhabi GP te an la hmabak a, season hmasa ang lo takin a tawp thlengin inelna a hmuhnawm dawn niin a lang.