Inkhelh kan duh tawh - ISL player-te

ISL hma hun chiang lo chungchangah ISL player-te an ṭawng chhuak ve leh ta a, nimin lamah phei chuan thuchhuah inṭawm siamin, "Inkhelh kan duh tawh a ni," an ti thlawt!

AIFF lamin ISL tihkhawtlai nana a tih Indian Super Cup chu tunah hian khelh mek a ni a, a tirah chuan Super Cup khelh lai hian ISL khelh hun tur chungchang pawh lo chinfel hman beisei a ni.

Mahse, beisei angin thil a kal ta lo a, ISL player-ten thuchhuah inṭawm an siam ta hial - ram khat league ve meuh, indo leh khuarel chhiatna vang ni loa khelh loh theih dinhmuna ding hi khawvel hmun dangah a awm ve kher lo mai thei a ni!

ISL player-te chuan, "Keini ISL-a inkhel professional footballer-te chuan, inthurualin ngenna hial kan siam a ngai ta - a pawimawh berah chuan Indian Super League khelh leh vat a nih hi kan duh tlang a, a tawi zawnga sawi chuan, inkhelh kan duh leh tawh a ni!

"Thinrimna, hrehawmna leh lungawi lohna kha, tunah chuan lungngaihna beidawn thlak takin a thlak ta a nih hi. Kan engkima engkim, kan fans leh kan chhungte hmaa inkhelh châkin kan vai ruai a ni ber e," an ti a, rei tak inkhel loa awm chu hrehawm an tih thu an sawi.

ISL player-te chuan sawi zawmin, "Hei hi India rama football thuneitu sang zawng zawngte kan ngenna a ni - kan inkhelh leh thuai theih nan tih ngai awm apiang chu ti u la, ṭum dang zawng aiin India hian a competitive football hi neih let a mamawh a ni," an ti.

A la tawp mai lo - ISL player-te chuan, "Khelmuala lut a, kan theihna pholang leh turin keini lam chu kan inpeih reng a ni. Kan rama football thuneitu sangte hnena kan ngenna chu, kan duhna hi peh hel awm loa min tihhlawhtlinsak hi a ni.

"Hmun thim takah, chhuah hlan nghakin kan awm rei ta. Khaw êng tlem tal hmuh kan châk tawh tak zet," an ti a, AIFF chu a rang lama hma la turin an ngiat.

ISL-ah hian club 14 an awm mek a, season hmasaa club 13 chu I League champion Inter Kashi an kaisan tak avangin club 14-ah a pung chho.

Inter Kashi bakah hian Bengaluru, Chennaiyin, SC Delhi, East Bengal, FC Goa, Jamshedpur FC, Kerala Blasters, Mohammedan SC, Mohun Bagan, Mumbai City, NorthEast United, Odisha leh Punjab FC te chu ISL club an ni.

SC Delhi hi club thar an ni hran lo a, Hyderabad FC hminga ISL khel ṭhin club chuan an awm hmun sawnin, Delhi lamah an insawn a, hei vang hian an club hming pawh SC Delhi tiin an thlak ta zawk a ni.