Mohun Bagan an nghing e!

Kum laihawl vela Indian Super League club-te an nghing laih laih lai pawhin Mohun Bagan Super Giant an nghing ve lo a, mahse, AIFF-in commercial partner tura diltu a hmuh loh meuh chuan an nghing ve ta.

Kolkata club hian AIFF-in commercial partner tur a hmu lo tih a chian rualin an football inrelbawlna chu an titawp lailawk a, thla tharah player leh staff te contract an zirchian tur thu an sawi.

Mohun Bagan official pakhat chuan, "Thawhṭanni khan training ṭan leh tawh tur kan ni a, mahse, ISL hma hun a chian loh avangin kan tawp lailawk rih.

"ISL hma hun chian loh avangin season tihkhawtlai reng a ni a, thla tharah contract zawng zawng kan zir chiang leh vek ang. Bagan hnuaia player leh staff te hlawh erawh hren kan nei lo a, a pek dan ngaiin kan pe reng thung," a ti.

Kum laihawlah khan ISL club tam takin an player-te hlawh hrengin, club ṭhenkhat chuan player-te chu an duh lam pan turin zalenna an pe hial.

Mahse, AIFF lamin ISL kalpui tura hma a lak avang leh, Super Cup khelh tura ruahmanna siam a nih takah chuan ISL club-ten player-te hlawh pein, kal dan ngaiin an kal leh a, tunah an buai leh ta!

Khatihlai zawnga buai lo Bagan chu a buai ber an ni ve ta a, club dangin an hnung an zui lo ang tih a sawi theih loh - Odisha phei chu Super Cup-ah pawh an inlan ve lo.