I League hma hun pawh a chiang lo!

India rama club football inelna sang ber ni ṭhin, tun hnua second division ni ta, I League khelh hun tur pawh a la chiang lo - I League club-te an lungawi lo hle.

I League-ah hian Mizoram aṭang pawhin Aizawl FC leh tun season-a I League khel tura inpetkai Chanmari FC te an inlan dawn a, mahse, Mizo club-te pawhin an khel hun tur an la chiang thei lo.

Vanglaini thudawn danin, I League club-te hi vawiin hian New Delhi-ah an inhmu dawn a, an kal zel dan tur an rel dawn - tuna an ruahmanna awm sa langsar zingah chuan, Minister of Youth Affairs and Sports hmuh an tum chu a tel.

I League-ah hian Aizawl FC, Churchill Brothers, Chanmari FC, Dempo, Diamond Harbour, Gokulam Kerala, Namdhari, Rajasthan United, Real Kashmir, Shillong Lajong leh Sreenidi Deccan te chu club an ni.

Mizoram Premier League champion Chanmari leh Diamond Harbour te chu I League kai thar an ni a, hetihlai hian Sporting Bengaluru leh Delhi FC te chu I League 2nd Division lamah an tla thung.