Sinner tan hna a awlsam

Jannik Sinner chuan ATP Finals 2025 a match hmasa berah harsatna a tawk lo - Italian tlangval hian Felix Auger-Aliassime chu 7-5, 6-1 in a hneh, chak tur hian darkar khat leh minute 41 bak hun a hmang lo hial a ni.

Kum 24 mi Sinner hian a tir aṭanga a tawp thlengin inkhel a thunun hneh hle a, a khingpui hi a service chhuhsak theihna remchang pawh a siamsak miah lo, indoor bikah a zawna match 27 chak tluang thei a nihna chu a chhawm nung zel.

Italian tlangval Sinner hian AFP Finals bikah chuan, kum 2023 khan Novak Djokovic a ngam lo a, chumi hnuah set a la hloh leh miah lo - kuminah pawh hian champion tura rinkai leh buk rit ber a ni mek.

Seeded pahnihna Sinner chuan, "Awlsam hmel tak angin lang mah se a hahthlak, 6-5 a nih hnuah khan kawng a inhawng zau chauh. A service chhuhsak theihna remchang ka hmuh hmaaak ho pawh ka ti fuh nghal vek lo.

"Tournament khelh hi chuan match hmasa ber hi chu a harsa ṭhin, tun ṭuma ka khelh danah ka lawm rualin ka khingpui in harsatna a nei erawh a pawi ka ti a, dam ṭha leh thuai turin duhsakna ka hlan a ni," tiin a sawi.

Felix Auger-Aliassime hi a chawn hliam vangin a buai a, inkhel tluan tho mah se a ṭhat dan berin a inlan thei lo. Canadian tlangval chuan, "Thil thar leh mak tak a ni hran lo, keimah aia player ṭha zawk ka hmachhawn avangin a chak lo zawkah ka ṭang.

"A hmasa berah chak lo mah ila ka tan kawng a inkhar vek tihna erawh a ni bik lo, tennis match hi engtik lai mahin huphurh leh hlauh hi ka nei ngai lo a, chuvangin ka hma a chona awm tur pawh huaisen takin ka hmachhawn ang," tiin a sawi.

Bjorn Borg Group inkhel hmasa lamah Alexander Zverev chuan Ben Shelton chu straight set hmangin a lo hneh tawh bawk a, player palite hi an inkhelh kual vek hnuah a sang pahnih ten semifinal an inhlangkai chhunzawm ang.

Thawhṭanni zan inkhel dangah, season hmasa finalist Taylor Fritz chuan Lorenzo Musetti chu 6-3, 6-4 in an hneh, anni hi Jimmy Connors Group lama awm an ni thung. Musetti hi Novak Djokovic inhnuhdawh vanga inlan leh chawpchilh a ni a, a tan thil a awlsam lo.

Kum 28 mi Fritz chuan, "A tir lamah kha chuan ka inkhel kha a nghet lo em em a, insiamrem tur khan hun ka mamawh. Player ṭha hlir kan hmachhawn a ngaih dawn avangin tihsual neih tlem a pawimawh, fimkhur takin ka khel zui ang," tiin a sawi.

ATP Finals hi mipa tennis ranking sang zual pariat inelna a ni a, group pahnihah ṭhen hran an ni. Sinner leh Carlos Alcaraz te chuan nomawi mai bakah number 1 ni chunga season khar thei zawk nih an inchuh mek bawk.

Champion lai Sinner tan number 1 ni chunga kum tawp hmang turin nomawi humhim a tawk lo, a elpui Alcaraz a chet fuh loh tel a ngai. Spanish star Alcaraz erawh a kutah engkim a innghat, group match hoa hnehna changa semifinal a luh chuan ranking sang ber a ni tlang dawn a ni.