Lionel Messi a inngaihtuah phawt dawn

World Cup 2026 khelh hun a hnai chho zel a, champion lai Argentina chu an captain Lionel Messi hoin an la khel thei dawn em tih a chiang lo, inelna lian hmachhawn turin tling tawh mah se Messi hian a mimal dinhmun a ngaihtuah hmasa dawn.

Nakkum June a nih chuan Messi hi kum 39 mi a ni tawh dawn a, khawvela huapa football inelna ropui berah hian ṭha takin a la khel thei ang em tih chu zawhna lian tak a ni, a champion tawh tho avangin atan hlen chhuah leh tur dang a awm tawh lo.

Messi chuan, "World Cup khel leh thei ila chu duhthusam a ni a, a chakawmin a phurawm hle bawk ang. Theih ni se la chuan Argentina tana theihtawp chhuah a, ka ṭhiante ṭanpuitu nih theih ngawi pawh ka chak.

"Mahse, engkim sawi lawk vek theih a ni lem lo, nitin mai hian ka dinhmun hi ngun taka ngaihtuah a ni, chuvangin thu tak sawi lawk theih a ni lo. Ka taksa in a tlin a, ram tana inkhel tlak ka nih chuan inlan ka duh, mahse a la hlat avangin ngaihtuah ṭhat a ngai.

"Argentina chu champion chunga inlan tur kan ni thei dawn a, boruak pawh a danglam ngei ang. Ram tana inkhelh chu player zawng zawng duhthusam a nih avangin, kei pawhin duhthusam dang ka nei thei bik chuang lo," a ti.

Messi hian club leh ram tana nomawi chawi theih ho chu a chawi kim tawh a, a football zinkawng hnuhnung lam a zawh mek. Inter Miami tan a khel mek a, tun kartawpah erawh Argentina tan a inlan leh thung ang.

Lionel Scaloni leh a naute hian November 14, Zirtawpni zingah Angola an tum dawn a, chumi hnuah Puerto Rico nen an inkhel leh ang, kumin chhunga an match hnuhnung pahnih a ni tawh dawn a ni.

Argentina Squad:

Goalkeepers: Gerónimo Rulli (Marseille), Walter Benítez (Crystal Palace).

Defenders: Nahuel Molina (Atlético Madrid), Juan Foyth (Villarreal), Cristian Romero (Tottenham Hotspur), Nicolás Otamendi (Benfica), Marcos Senesi (Bournemouth), Nicolás Tagliafico (Lyon), Valentín Barco (Racing Strasbourg), Kevin Mac Allister (Union Saint-Gilloise).

Midfielders: Alexis Mac Allister (Liverpool), Rodrigo De Paul (Inter Miami), Giovani Lo Celso (Real Betis), Thiago Almada (Atlético Madrid), Máximo Perrone (Como), Nicolás Paz (Como), Leandro Paredes (Boca Juniors).

Forwards: Lionel Messi (Inter Miami), Lautaro Martínez (Inter Milan), Julián Álvarez (Atlético Madrid), Nicolás González (Atlético Madrid), Giuliano Simeone (Atlético Madrid), José Manuel López (Palmeiras), Gianluca Prestianni (Benfica), Joaquín Panichelli (Racing Strasbourg).