A zawnin Mizoram under 23 team an chak

Board of Control for Cricket in India (BCCI) hnuaia inelna - Men's U-23 State A Trophy Plate Group match pahnihnaah Mizoram chuan nimin khan Sikkim chu wicket nga in an hneh.

Ropar Cricket Ground, Ropar-a inkhelah, ṭhum vawra vannei zawk Mizoram lamin vawm hmasak an thlang. Over 41 chhunga run 134 chauh siamtirin Sikkim an out vek!

Mizoram tan Ṭhuampui tlangval Sahil Sharma chuan wicket hnih lain, Johan Lalbiakkima, Lalhmangaihzuala, PC Zothankima, Prem Kumar Layak leh Lalduatliana te'n wicket khat ṭheuh an la ve bawk.

Mizoram vuak hun a thleng a, captain Johan Lalbiakkima chuan run 53 siamin a out lo. Ramhlun Venglai rawlthar bakah hian Vanlalpekhlua chuan run 15 a siam a, Marcus Lalpekhlua (14 runs) leh Nasib Rai (12) te an langsar bawk.

Harsa lutuk loin Mizoram hian over 40.3 lekah target an tlin a, wicket nga a hnehna changin inelna neih laiah a zawnin an chak ta chiah bawk a ni.

Group B-ah Mizoram hi awmin an match hmasa zawkah Nagaland chu wicket liin an lo hneh tawh. November 13, Ningani hian Manipur nen an inhmachhawn leh ang, chumi hnuah Meghalaya leh Arunachal Pradesh te an la hmachhawn leh ang.