Xhaka hi player lei fuh ber a ni hial ang - Rooney

Manchester United striker hlui Wayne Rooney chuan, tun nipui bazar inhawn laia Premier League club ten player an lei zingah Granit Xhaka chu a fuh ber a ni a rin thu a sawi.

Arsenal midfielder hlui Xhaka hian Bayer Leverkusen a champion pui hnuah Sunderland a zawm a, English club tan hian captain armband a hreng nghal - Black Cats hi season ṭha tak hman puiin palina an ni mek.

Rooney chuan, "Premier League-ah a lo kir leh a, team indinthar leh kai thar hlim tana a hnathawh hi hmuh hmaih theih a ni lo. Tuna a chet dan chinah hi chuan tun season chhunga player lei fuh ber a ni hial ang.

"Arsenal tana a khelh lai pawh khan puitling takin a lo che tawh ṭhin, fans lamin an duh lohna an lantir luih luih hnuah khan an thinlung a hneh let thei a, player puitling leh ze nghet tak nei a ni tih chu a hriat.

"Leverkusen tana a khelh lai khan Bayern Munich khumin Bundesliga nomawi an chawi a, khatiang thil kha a vangin a khat hle bawk. Tunah Sunderland tan hian player a ni satliah lo a, tawnhriat nei tlem leh la naupang tak tak tan hian hruaitu ṭha a ni bawk," a ti.

Sunderland hian tun season EPL match 11 aṭangin point 19 an hmu thei a, palina niin an chungah hian - Chelsea, Manchester City leh hmahruaitu Arsenal te chauh an awm, an tan chuan tuna an dinhmun hi beisei phak baka sang a ni ngei ang.