Mizoramin Manipur an hneh lo, beisei a la awm

Ranji Trophy-ah Mizoramin nimin khan Manipur wicket ngain an hneh lo a, tun inelnaah match khat khelh tur la awmin final khelh beiseina erawh an la nei thung. Inelna hi Gujarat-a khaw pakhat Anand-ah neih a ni a, November 8-10, 2025 chhung khan khelh a ni.

Inkhel chu

Mizoram hi ṭhumvawrah a vannei zawkah an ṭang a, pitch a hnawng deuha an hriat avangin vawm hmasak an thlang. Mahse, Mizoram lamin pitch an chhutsual a, ni khatnaah vuak a nuam a, Manipur-in 400 runs an siam.

Mizoram bat hun a thleng a, top order lam an che ṭha tawk lo. Jehu Anderson (21) leh Lalhruaizela (42) te run 20 an vaw tling chungin 143 runs chauh an siam a, an siam tlem mah mah.

Manipur lamin Mizoram hi an follow on tir a, Hruaizela'n bul rawn ṭanin a che ṭha zui tawh lo. Jehu Anderson pawh pathumnaah lut mah se run khat chauh a siam. Mahse, captain Joseph Lalthankhuma (69) leh Armaan Jaffer (81) ten half century an siam a, tailender lamah Vanrotlinga (39), Bobby Zothansanga (12) leh Lalrempuia (10*) ten rawn belh bawkin second innings-ah 268 runs an siam.

Ranji hi ni li khelh a ni a, nimin khan a ni tawp berna khelh niin Manipur tan chak turin 12 runs chauh siam a ngai. Mizoram lamin spinner hmangin risk an la a, wicket nga an la hman. Mahse, an target chhawp a tlem mah mah a, over nganaah Manipur-in 12 runs siamin wicket ngain hnehna an chang.

Beiseina chu

Ranji Trophy-ah hian chakin point ruk a ni a, chak loin point an hmu lo. Innings emaw wicket 10 emawa an chak chuan point khat (bonus) hmuh tur a awm a, match khatah point sarih a hmuh theih tihna a ni.

Draw hian point inang an hmu ringawt lo. First innings-a chak zawkin point thum an hmu a, a chak lo zawkin point khat. Manipur-in point 17 hmuin final an lut tawh a, Mizoramin point riat hmuin palinaah an awm.

Mizoram hi palinaah awm mah se match tawp berah an chunga awm point 10 hmu Bihar an hmachhawn dawn a, hnehna an chang a nih chuan point 15 an hmu dawn. Wicket 10 emaw inning khata an chak a nih chuan point 16 an hmu thei dawn.

Mahse, Bihar chungah hian point 12 hmu tawh Meghalaya an la awm a, anni hian Manipur an hmachhawn dawn. Manipur-in Meghalaya hi an hneh a nih chuan Mizoram tan beiseina a inhawng dawn a, an inhnehtawk a nih pawhin Mizoram tan beiseina a la awm zel ang.

Sikkim hi panganaah an awm a, point riat chauh la hmu mah se point la hmu lo Arunachal Pradesh an hmachhawn dawn avangin point ruk hmuh theih dan an nei a, beisei tur a la awm ve bawk.

Engtin zel?

Group match hnuhnung ber hi November 16-19, 2025 hian khelh a ni dawn a, Mizoram leh Bihar hian Patna-ah an khel ang. Manipur leh Meghalaya hian Surat-ah an khel dawn a, Sikkim leh Arunachal Pradesh te hian Rangpo-ah an khel dawn a, an khelh hun erawh a inang vek ang.

Mizoram assistant coach K. Vanlalruata chuan, "Mizoram pawhin hma kan sawn viau tawh a, elite a luh kan tum khawp mai. Mahse, match hmasa bera ruahsur vanga Meghalaya kan hmachhawn thei lo kha kan la tuar zel. Manipur bik hi chuan hma an sawn a, kan tluk lo deuh a ni. NorthEast lama ruah a sur laiin Delhi velah anmahni sumin training an nei a, season khata nuai 20 vel hlawh an ni a, nuai 1-3 vel senga inchher hriam kha an ngam tlat. Hei hi hma an sawn chakna chhan a ni," tiin Vanglaini a hrilh.