#AskMesut Arsenal tana khelh inchhir lo Mesut Ozil

Mesut Ozil chuan Arsenal zawm tura thutlukna a lo siam tawh chu a inchhir loh thu a sawi a, North London club a chhuahsan hunah chuan United States emaw Turkey lamah emaw inkhelh a tum thu a sawi.

Gunners playmaker hi dinhmun khirh takah a ding mek, a club khelh mekna in an squad-ah an telh lo - a thisena bet tlat tawh Fenerbahce nen sawi zawm mek niin, tun thlasik bazar chhungin Turkey lam a pan dawn niin a lang.

Ozil hian social media pakhat twitter kaltlangin amah ṭantute chu zawhna zawh hun a siam a, zawhna zawt duh tan zawhna an ziah bakah hashtag hmangin #AskMesut tih an chhu tel. Thawhlehni zan khan darkar thum chhungin zawhna hrang hrang hi a chhang a ni.

Germany international hlui hian a mimal nun, team leh a hma hun chungchang a chhang ber - Arsenal tana a khelhpui zingah ṭha a tih zual 11 thlang chhuak tura an tihna pawh a chhang.

Arsenal tan player tam tak a khelhpui tawh a, chung zingah chuan "Ospina - Sagna, Koscielny, Mertesacker, Kolasinac - Cazorla, Ramsey - Serge Gnabry, Ozil, Alexis Sanchez - Aubameyang" te chu khelhpui nuam leh thiam a tih zual an ni.

Real Madrid aṭanga Arsenal zawmtu hian tun season tawp thleng daih bak North London club tan contract a nei tawh lo. A hma hun zawhna chhangin Ozil chuan, "German-Turkish mi Germany a seiliante chuan Turkish team ṭan zawng kan nei vek, kei chu Fenerbahce.

"Fenerbahce hi Spain rama Real Madrid ang a ni a, ram chhunga club lian ber a ni. Inkhelh ka chawlh hmain ram pahnihah inkhelh châkna ka nei - US leh Turkey a ni. Turkey ka pan a nih chuan Fenerbahce chauh ka zawm ang," a ti.

Ozil hi German rama piang ni mah se Turkish thlah a ni a, Muslim sakhaw zuitu a nih bawk avangin Turkey a ngainatna a reh thei lo - a nupui Amine Gulse pawh Miss Turkey 2014 niin, Miss World 2014-ah khan an ram aiawhin a inlan; an tan chuan Turkey hi ngainat tur pawh an ni.

Arsenal tana khelh chungchang sawiin Ozil chuan, "Tun thleng chuan hlim leh lungngaih chang a awm, ka hun tawn zawng zawng chhut kir chuan Gunners ka zawm hi ka inchhir lo. Coronavirus vanga kan chawlh hma lawk pawh khan hlimna tam tak a awm.

"Hun hlimawm leh nuam tak kan hman laiin hri a leng a, vanduai thlak takin a hnu lam boruak a inthlak ta a ni," a ti. Ozil hian nikum March 7 hnu lamah Arsenal tan a la khel leh lo a, squad aṭangin a hming an paih hial.

Ozil an chhawr duh loh chhan hi chiang taka sawi lan a awm lo. China nena buaina vang tia sawi an awm a, manager Mikel Arteta erawhin hun a pek thu leh, a beisei anga a chhawr theih loh thu a sawi ve thung.

Arsene Wenger kha ka nuna coach pawimawh tak a ni, ka zah takzet bawk. Coach ropui leh hlawhtling tak a ni a, a thil tihah a thutak thei hle - Arsenal tana ka hlawhtlin theihna chhan chu amah kha niin, hun hlimawm kan hman duh kha ka hre reng tawh ang.

Tun hnaiah Emile Smith Rowe a khel ṭha thei hle a, number 10 dinhmun ṭha taka a luah avangin ka lawmpui hle. Tunlai football huangah number 10 pawimawhna a lantir niah ka ngai.

Tehreng mai - Emirates Stadium chhunga fans lamin ka tana hla an sak kha ka hre reng tawh ang, a vawi khat nana ka hriat phei kha chuan mak ka tiin ropui ka ti hle. Football ka khelh hun chhunga ka cham reina hmunah hna ṭha takin ka thawk tih a entirah ka ngai bawk.

Chhan harsa lo tak a ni, ka chawl ang.

Sergio hi hun rei tak chhung chu world class player a ni tawh. A tum a ruhin khelmual chhungah hruaitu ṭha a ni a, a thiamna leh theihna bakah hruaitu ṭha a ni. Kan hun laiah chuan khawvela defender ṭha ber a ni.

Germany team ṭha berte zinga miah ka tel a, Brazil-ah khan World Cup kan chawi hial. Germany tana ka inkhel kha ka inchhir ngai lo a, tun thlengin ka la inchhir lo bawk.