England-in Chalobah leh Trafford ko

World Cup qualifier khel tur England chuan, hliam vanga Newcastle United forward Anthony Gordon leh keeper Nick Pope te an inhnuhdawh avangin Chelsea defender Trevoh Chalobah leh Manchester City keeper James Trafford te Three Lions squad zawm turin an ko.

Newcastle manager Eddie Howe chuan a player pahnih, Gordon leh Trafford inhliam thu hi sawiin, Football Association chuan Thawhlehni zan khan player pahnih an inhnuhdawh thu hi an puang ve leh ta a ni.

Kum 26 mi Chalobah hi May thla khan a vawi khat nan England squad-ah koh a ni a, Senegal lakah ram tana a match hmasa ber a khel zui. Mahse, hemi hnu hian Thomas Tuchel-a'n a ko leh tawh lo a, tunah erawh player inhliam pahnih an awm leh avangin koh a ni ve leh ta.

England boss Thomas Tuchel hi Chalobah-a career-a a coach pawimawh pawl tak niin, Chelsea e enkawl lai khan English defender hi Blues tana a match hmasa ber a lo khelhtir tawh bawk.

Kum 23 mi Trafford hi England tan age level hrang hrangah inlan tawh mah se, senior team tana la inlan ngai lo a ni a, City second choice keeper hi Thomas Tuchel-a'n tun international break-ah ram tana a match hmasa ber a khelhtir lo ang tih a sawi theih loh.

England hian zanin dar 1:15-ah Serbia an hmachhawn ang a, November 16, Pathianni zanah Albania an lenchilh dawn thung - World Cup qualifier a ni a, Three Lions hi nakkuma World Cup khel tura an tlin chian tawh avangin, coach Tuchel-a'n player enchhin nan a hmang a nih pawhin a mak lo ang.

Hetihlai hian ke phah hliam, Crystal Palace defender Marc Guehi chuan Three Lions squad chhuahsan loin a la awm rih a, Tuchel chuan, "A hliam dinhmun kan en zel ang," a ti a, an hahdamtir rih zawk a rinawm.

England squad

Goalkeepers: Dean Henderson (Crystal Palace), Jordan Pickford (Everton), James Trafford (Manchester City)

Defenders: Dan Burn (Newcastle United), Trevoh Chalobah (Chelsea), Marc Guehi (Crystal Palace), Reece James (Chelsea), Ezri Konsa (Aston Villa), Nico O'Reilly (Manchester City), Jarell Quansah (Bayer Leverkusen), Djed Spence (Tottenham Hotspur), John Stones (Manchester City)

Midfielders: Elliot Anderson (Nottingham Forest), Jude Bellingham (Real Madrid), Jordan Henderson (Brentford), Declan Rice (Arsenal), Morgan Rogers (Aston Villa), Alex Scott (Bournemouth), Adam Wharton (Crystal Palace)

Forwards: Jarrod Bowen (West Ham United), Eberechi Eze (Arsenal), Phil Foden (Manchester City), Harry Kane (Bayern Munich), Marcus Rashford (Barcelona, loan from Manchester United), Bukayo Saka (Arsenal)