Aston Villa vangin fixtures thlak

Covid-19 in Aston Villa a run avangin Premier League fixtures thlak danglam a ṭul phah. Villa hi zanina Tottenham Hotspur nen inkhel tur ni mah se Jose Mourinho hoten Fulham an hmachhawn ta zawk dawn. 

Hun tep ter taka Premier League thuneitute thutlukna an siam chhan hi Villa Park-a coronavirus dinhmun a la inthlak danglam loh vang a ni a, medical lam thurawn lain thutlukna an siam ta a ni.

Villa first team squad aṭangin player 10 zetin Covid-19 an kai a, manager Dean Smith pawh inkhung hrang zingah a tel. Villa hian training ground an khar a, FA Cup third round-ah pawh Liverpool hmachhawn turin Under 23 leh Under 18 player-te an khelhtir a, 4-1 in an tlawm.

Premier League chuan, "Aston Villa-in player leh staff Covid-19 vanga inkhung hrang an tam avangin inkhelh hun sawn an dil a, Premier League tan chuan inkhelh hun sawn mai loh chu tih theih dang a awm lo. Player leh staff te hriselna kan ngai pawimawh a, Aston Villa pawh an thiang hunah an inkhelh hun tur ruahmanna siamsak an ni ang," tiin thuchhuah an siam.

Spurs leh Aston Villa inkhel hian nghawng dang a nei nghal a, Mourinho hote hi awl mai loin Fulham nena inkhel tura tih an ni. Nikum December thla khan Spurs leh Cottagers hi inkhel tur an ni a, amaherawhchu an sawn tak avangin tun hun hi Premier League lamin remchangah an la. 

Spurs leh Fulham zanina an khelh dawn tak avangin Zirtawpni zana Cottagers leh Chelsea inkhel tur chu Inrinni zanah sawn a ni ta bawk. Tottenham-in Pathianni zan khan FA Cup-ah Marine 5-0 in an hneh a, hemi zawh hian Villa nena an inkhel tur chungchang Mourinho an zawt.

Portuguese manager chuan, "Kan khelh ngei ka ring. Tu mahin kan inkhelh loh tur an sawi si lo a, Thawhṭanni aṭangin Villa hmachhawn turin kan inpuahchah ang. Chutiang bawkin Thawhlehniah pawh kan inpuahchah ang, thu thar a awm a nih ngawt loh chuan," tiin a sawi a, hei hian hun tep ter takah fixtures an thlak tih a nemnghet.