Shillong-ah veteran friendly match

Mizoram veteran leh Shillong veteran ten November 14-15, 2025 hian Shillong-ah football friendly match an khel dawn a, inkhel turte hi kum 50 chunglam an ni.

Ratson Football Arena, Mawiong, Shillong-ah friendly match hi neih tur a ni. Match hmasa zawk hi November 14, Zirtawpni tlai dar 1:00-ah khelh a ni ang a, match hnuhnung zawk hi November 15, Inrinni tlai dar 3:00-ah khelh a ni ang.

Mizoram aiawh turte hi Mizoram Footballers Hranghluite te an ni a; F. Lalṭanpuia'n (ṬPa) captain hna a chelh dawn a, tel tur zingah Hrangzuala, Liantluanga Khawlhring, Jack Manga, Laldika leh Vanhlupuia te an tel. Mizoram coach tur hi Lalremtluanga a ni ang.

Shillong-a kalna man hi Aizawl FC neitu Robert Romawia Royte-in a tum dawn a, sports minister Lalnghinglova Hmarin jersey hak tur hi a tum thung.