Inkhel hmuhnawmah Alcaraz a chak

Carlos Alcaraz chuan fiahna hautak a paltlang - Thawhlehni zan ATP Finals inkhelah Alcaraz hian Taylor Fritz lakah set hloh mah se, huaisen taka bei letin 6-7 (2-7), 7-5, 6-3 in hnehna a chang.

Spanish star Alcaraz hian hnehna chang turin darkar hnih leh minute 48 chhung hun a hmang, inelna neih laiah hian a zawnin match hnih chak tawh mah se semifinal erawh a la lut chiang rih bik lo, chutihrualin group match hnuhnung ber a khelh hma pawhin midang inkhel result a zirin tlang thei tawh a ni.

Alcaraz tan ATP Finals hi a pawimawh zual, a champion kher lo a nih pawhin Lorenzo Musetti hneha semifinal a lut a nih chuan world number 1 ni chungin season a khar thei dawn, atan chuan chak a pawimawh hle.

Kum 22 mi Alcaraz chuan, "Number 1 nih chungchang hi chu ngaihtuah thiam a harsa, rilruah chuan awm ve bawk mah se ka sawi chhuak thiam lo, nih ka chak leh duh ni bawk mah se thil awlsam a ni lo tih ka hre chiang bawk.

"Theih ni se la chuan player zawng zawng hian world number 1 nih an duh ang, mahse a remchang lo chin hi a awm ve thei a ni. Match khelh lai bik phei chuan ranking hi chu ka ngaihtuah duh ngai lem lo," tiin a sawi.

Seeded parukna Fritz hi season hmasa khan ATP Finals-ah hian finalist a ni thei a, kuminah pawh rinkai zinga mi a ni phak; player ṭha leh hautak deuh te a hmachhawn thiam ṭhin a, tun ṭumah pawh hian semifinal lut turin atan kawng a la inhawng.

Alcaraz chuan, "Fritz nena kan inkar kha zim te chauh a ni a, a tawpah khan a vannei zawkah ka ṭang mai chauh am ni. Taksa leh rilru a chau a, chutiang kara hnehna chan theih hi chu a lawmawm zual bik," tiin a sawi.

Inkhel dangah Lorenzo Musetti chuan Alex de Minaur lakah 7-5, 3-6, 7-5 in hnehna a chang - Novak Djokovic inhnuhdawh vanga inlan ve thei chauh a ni a, tla hma ber tura ngaih ni mah se huaisen takin a la inhamtang.

Kar hmasa lawk khan Musetti hi Athens kawpuiah inkhelin final-ah Djokovic a hneh lo a, a thiam zual pariat zinga tel turin a tling zo lo chiah. Mahse, Djokovic a inhnuhdawh leh si avangin a tan kawng a inhawng a ni.

Italian tlangval Musetti chuan, "Alex kha a khel ṭha em em a, a ball vuak a nain a dik thei hle bawk. Mahse, kei pawh hi pasalṭha ka ni a, player ṭha leh husen tak tak pawh hneh thei ka nihzia ka lantir avangin ka lawm," tiin a sawi.

Jimmy Connors Group-a player pali awmten match hnih ṭheuh an khel tawh, seeded pakhatna Carlos Alcaraz hnuaiah Fritz awmin anni pahnih hi semifinal lut thei chinah an la awm mek; Musetti leh Alex de Minaur te pawhin beisei an la nei ve bawk.