Sinner chungchang an hre reng dawn - Djokovic

Novak Djokovic chuan damdawi hman phal loh chungchangah Jannik Sinner an hremna chu hriatreng a ni tawh dawn tih a sawi a, a ṭha lo zawnga nghawng nei thei niah a ngai.

Sinner hian damdawi hman phal loh a hmang a ni tih hmuh chhuah a ni a, vawi hnih ngawt endikna a paltlang lo. World Anti-Doping Agency chuan a thil tihsual hi an hre chhuak a, hremna pawh a hmachhawn.

Mahse, Italian tlangval chungah hremna na tak lekkawh a ni lem lo - thla thum chhung atan chauh an hrem, an hrem hun chhung pawh hi Grand Slam khelh lo karlakah chauh a ni bawk, hei hian sawi zui a hlawh hle; Djokovic pawhin a rawn sawi thar leh a ni.

Grand Slam vawi 24 champion tawh Djokovic chuan, "Covid 19 khan ka nunah nghawng tam tak a nei a, ka tih tur tam tak ka tih theih loh bakah invenna damdawi ka lak duh loh avang khan sawisel pawh ka hlawh nasa.

"Ka chanchin an sawi chang chuan hripui leng vanga ka buaina kha an sawi lang ve zel tawh dawn a, chutiang ang bawk chuan Sinner pawh hi damdawi hman phal loh leh an hremna chungchang nen khan sawi zui a ni ve reng tawh ang.

"Thil ṭhenkhat chu kan nun aṭanga dah bo leh lak kian daih kan duh te a awm, mahse ṭhenkhat chuan kan duh lo chung chung pawhin min zui reng ve bawk a, hringnun hi chhiar dan thiam pawh a pawimawh hle.

"A bik takin dan bawhchhiat chungchangah hremna a inang lo thei hle. Sinner pawh ama duhthu ngeia tisual lui a nih chu ka ring lo, amaherawhchu mite chuan an sawi zui ve reng tawh dawn a ni," a ti.

Sinner hremna hi mi tam takin an sawisel, damdawi hman phal loh vanga hremna hi kum li hial te a ni thei a, a ro lo zinga mi pawh thla 18 te a ni ṭhin - Sinner erawh thla thum chhung atan chauh hrem a ni, an hrem hlim pawhin Djokovic hian a lo sawisel tawh bawk.