F1 season ṭan tlai dawn

Season hmasa ang bawkin Formula 1 chu a hun pangngaiah ṭan theih a ni dawn lo. Car intlansiakna sang ber hi March 19 aṭanga neih tur ni mah se, intlansiakna hmasa ber tur Australian Grand Prix chu Covid-19 vangin a hun sawn a ngai.

Australian GP bakah hian calendar siam lawk aṭanga pathumna Chinese Grand Prix te chu hri leng vang hian a hun sawn a ni. Inelna pahnihna tur Bahrain GP chu March 26-ah tlan tur a ni dawn a, an sawn lo a nih chuan hei hi season bul ṭanna a ni ang.

Australia hian ram dang aṭanga zin lutte tan dan zawm tur khirh tak a zam a, hei hi F1 team lam tan zawm harsa tak tur a ni. Melbourne khawpuiah hian November 19-21 chhunga inelna neih an tum dawn. Chinese GP tlan hun tur erawh sawi chian a la ni lo.

F1 president Stefano Domenicali chuan, "Season kan hman turah kan ruahman sa ṭhenkhat chu sawn ngai mah se, hmun ṭhenkhat erawh sawn a nih dawn loh avangin a lawmawm hle.

"Khawvel huapa hrileng hi a la reh mai dawn lo, chutih rualin nikum khan hlim taka inelna a hmachhawn theih a ni tih kan lantir tawh. Kuminah pawh fimkhur tak chung siin inelna kan neih leh ngei kan beisei," a ti.

Bahrain GP bakah hian April 19-18 chhung hian Italy ramah inelna neih tur a ni dawn. Australian GP an sawn avang hian Brazil, Saudi Arabia leh Abu Dhabi lama inelnate a nghawng dawn a, an tlan hun tur erawh an la ti fel lo thung.

Season hmasa khan hri leng vangin intlansiak an ṭan tlai a, an zo har bawk - vawi 17 chauh inelna an nei. Kuminah hian ruahman dan chuan intlansiak vawi 23 neih an tum. F1 neitu lam hi chuan a tam thei ang ber inelna neih hi an duh leh tum dan a ni.