Man United mikhual tur Liverpool

Thawhṭanni zan khan FA Cup fourth round-a intum tur pawh a ni a, Manchester United leh Liverpool an inhmachhawn dawn. Club lian pahnihah tu emaw zawk chuan last 16 an lut

dawn lo tihna a ni. Chutihrualin Liverpool-in January 17, Pathianni zan dar 10 hian Premier League-ah Manchester United an mikhual dawn a, FA Cup-ah an inhmachhawn leh dawn bawk avangin January thlaah ṭum hnih inkhel hmuhnawm thlir tur a awm ang.

FA Cup fourth round hi January 23 chhoah hian khelh a ni dawn. Fifth round-a intum tur pawh nghal a ni a, Man United leh Liverpool inkhela chak zawkte hian West Ham leh Doncaster Rovers inkhela chak zawk an hmachhawn ang. 

Fourth round-ah hian Arsenal leh Southampton inhmachhawn theih dan a awm a, Saints-in Shrewsbury an hneh chuan Gunners nen an inkhel dawn. Fulham leh Burnley pawh last 32-ah hian inkhel dawn.

Fifth round-ah erawh Premier League club inhmachhawn thei tur an awm fur a, last 16 hi February 9 chhoah khelh a ni ang. Covid-19 vangin FA Cup-ah hian replay a awm lo a, an inhnehtawk a nih chuan extra time an khel a, chak zawk an la awm lo fo a nih chuan penalty shootout hmangin chak zawk an zawng.

Man United leh Liverpool te hi English club ropui pahnih an nih avangin an inhal a, chutihrualin club pahnih inhal chhanah hian sumdawnna thilte a tel avangin khelmuala an inkhel boruak sang ṭhin hi a mak lo. Team pahnih hi vawi 204 zet an inhmachhawn tawh a, Man United hi vawi 80 an chak a, Reds hi vawi 67 chakin vawi 57 an inhnehtawk.

Club pahnih inkarah Man United chak ngun zawk mah se tun hnaiah erawh Liverpool thawm a ring zawk a, chutihrualin FA Cup-a an inkhelhna tur hi Old Trafford a nih avangin Jurgen Klopp-a hote chak zawk tura dah ngawt a him lo ang.